‘लॉकडाऊन’ने खासगी दवाखाने बंद

परभणी : ‘कोरोना’ विषाणुचा प्रादुर्भाव झाल्यामुळे केंद्र सरकारने ‘लॉकडाऊन’ जाहीर केले आहे. या ‘लॉकडाऊन’मुळे व विषाणुचा संसर्गाच्या भितीने शहरातील खासगी डॉक्टरांनी त्यांचे दवाखाने बंद केले आहेत.

परंतू साध्या-साध्या आजारासाठी कोणत्या डॉक्टरकडे जावे, असा प्रश्न सर्वसामान्य नागरिकांना पडला आहे. जिल्हाधिकाऱ्यांचे आदेश असतांनाही अनेक दवाखाने शुक्रवारी देखील बंदच असल्याचे निदर्शनास आले.
‘कोरोना’ संकटाच्या काळात खासगी रुग्णालये बंद ठेवु नका, असे शासन सांगत असले तरी परभणी शहरातील बहुतांष खासगी रुग्णालये बंद असल्याने रुग्णांची गैरसोय होत आहे. त्यामुळे त्या विशेष तज्ज्ञांची मेडीकल दुकाने देखील बंद राहत असल्याने रुग्णांना काही ठरावीक मेडीकल दुकानासमोर रांगेत उभे राहण्याची वेळ आली आहे. 

हेही वाचा - ‘लॉकडाऊन’ ने गव्हाची चढ्या दराने विक्री !

बाह्यरुग्ण तपासणी बंद
कोरोना विषाणुचा प्रादुर्भाव झाला तेव्हापासून शहरातील काही खासगी रुग्णालयांनी बाह्यरुग्ण तपासणी बंद केली आहे. गर्दी टाळणे गरजेचे असले तरी सरसकट लॉकडाऊन केल्याने आजारी व्यक्तींचे हाल सुरु झाला आहेत. काही तज्ज्ञांनी तपासणी सुरु केली आहे. परंतु काही विशेष तज्ज्ञांनी रुग्णालये बंद केली असल्याने त्यांच्याशी निगडीत मेडीकल दुकाने देखील बंद राहत आहेत. त्याचा परिणाम म्हणून त्या तज्ञांकडून या आधी तपासणी करुन गेलेल्या रुग्णांना पुन्हा औषधी घेण्यासाठी विविध दुकाने फिरावे लागत आहे. बसस्थानक परिसरात काही मेडीकल औषधी दुकानावर जवळपास सर्वच प्रकारची औषधी मिळत असल्याने अशा दुकानावर रांगा लागत आहेत.

हेही वाचा - ‘कोरोना’ साठी हा घेतला महत्वाचा निर्णय

गर्दी टाळण्यासाठी खासगी रुग्णालये सुर ठेवा
शहरातील काही मोठी खासगी रुग्णालये सुरु आहेत. मात्र, अन्य विशेष तज्ज्ञांची रुग्णालये बंद असल्याने रुग्णांची मोठी गैरसोय होत आहे.`त्यामुळे जिल्हा शासकीय रुग्णालयात बाह्यरुग्ण तपासणीसाठी गर्दी होत आहे. जिल्हा रुग्णालयात कोरोनाचे संशयीत रुग्ण असल्याने त्याठिकाणी पुन्हा गर्दी होत आहे. त्यामुळे ही गर्दी टाळण्यासाठी शहरातील खासगी विशेष तज्ज्ञांनी रुग्णालये सुरु करावीत, अशी मागणी होत आहे.
 

बहुतांश दवाखाने सुरु 
आम्ही जिल्ह्यातील सर्व डॉक्टरांना दवाखाने सुरु ठेवण्याच्या सुचना केल्या आहेत. परंतू छोट्या दुखण्यासाठी डॉक्टरांकडे गर्दी करू नका असे आम्ही आवाहन केले आहे. बहुतांश दवाखाने सुरु आहेत.
- डॉ. बी. एम. मोरे, अध्यक्ष आयएमए परभणी