Maratha Reservation: मराठा आरक्षणासाठी सरकारचा नवा GR; सरकारने पुन्हा वेळ मागितला, खोतकर काय म्हणाले?

Maratha Reservation: मराठा आरक्षणासाठी काल (शुक्रवार) मनोज जरांगे यांचे शिष्टमंडळ आणि राज्य सरकारमध्ये चर्चा झाली. दरम्यान आज सरकारचे आणि मनोज जरांगे यांचे शिष्टमंडळ अंतरवली सराटी येथे दाखल झाले आहे. सरकारकडून जरांगे यांना पत्र देण्यात आले आहे. जरांगे यांनी सरकारने सुधारित जीआर काढण्याची मागणी केली होती. दरम्यान सरकारच्या वतीने माजी आमदार अर्जुन खोतकर यांनी पत्र वाचून दाखवले.

अर्जुन खोतकर म्हणाले, मी देखील या उपोषणामध्ये सहभागी आहे. पहिल्या दिवसापासून मनोज पाटील यांची आम्ही काळजी घेत आहोत. शासनासमोर हा प्रश्न मांडत आहोत. मुख्यमंत्र्यांनी देखील जबाबदारी मला दिली आहे. मनोज जरांगे यांच्या सुचनेबाबत (शुक्रवार) रात्री बैठक झाली. आम्ही नवीन जीआर काढला. संपूर्ण लढा यशाच्या मार्गाने गेला पाहिजे. अनेक पिढ्या मनोज पाटील यांच्या लढ्याचा इतिहास सांगतील.

सरसकट आरक्षणाची मागणी मनोज जरांगे यांनी केली होती. तसेच वंशावळीचा मुद्दा आणि सरसकट आरक्षणाबाबत जरांगे आग्रही होते. कालच्या बैठकीत ज्यांच्या नोंदी नाहीत. त्यांच्या संदर्भात अभ्यास करण्यासाठी मख्यमंत्री एकनाथ शिंदे यांनी वेळ मागितला आहे. समाजातील तज्ज्ञ लोकांनी समितीला मदत करावी, समिती संभाजीनगरला बसून काम करेल, असे खोतकर म्हणाले. 

मुख्यमंत्री एकनाथ शिंदे यांनी सांगितलं की जोपर्यंत निवृत्त न्यायाधीशांचा अहवाल येत नाही तोपर्यंत २००४ च्या जीआर अत्यंत प्रभावीपणे राबवावा.  २००४ च्या जीआरमध्ये तातडीने सुधारणा करण्यात येतील. काल (शुक्रवार) याबाबत चर्चा झाली. शिंदे समितीने देखील वेळ मागितला आहे. समितीला काम करण्याची संधी जरांगे पाटील यांनी द्यावी, अशी विनंती अर्जुन खोतकर यांनी सरकारच्या वतीने केली.