Maratha Reservation: ब्रेकफेल झालेला पिकअप कोणाचा? मनोज जरांगेंचा रोख कोणाकडे

Maratha Reservation: मराठा समाजाला आरक्षण देण्यासाठी राज्य सरकारने काल (मंगळवारी २० फेब्रुवारी) विशेष अधिवेशन बोलावलं. या अधिवेशनात मराठा समाजाला शिक्षण आणि नोकऱ्यांमध्ये १० टक्के आरक्षण देण्याचा निर्णय घेण्यात आला. मात्र, दुसरीकडे सरकारने आमची फसवणूक केली असून आम्हाला ओबीसीमधूनच आरक्षण हवंय, अशी भूमिका मनोज जरांगे पाटील यांनी घेतली आहे.

आज मनोज जरांगे यांनी आपल्या आंदोलनाची दिशा ठरवण्याबाबत बैठक घेतली. यावेळी बोलताना मनोज जरांगे म्हणाले, जे आम्हाला नको आहे, ते आरक्षण सरकार आम्हाला देत आहे. मराठ्यांना ओबीसीमधूनच आरक्षण हवं आहे. तर सरकारला सरसकट आरक्षण देण्यात काय अडचण आहे? असा सवाल जरांगे यांनी उपस्थित केला आहे, तर त्यांनी सरसरट मराठ्यांना आरक्षण द्यावं या आपल्या भूमिकेवर ते ठाम आहेत, सगेसोयऱ्यांच्या अधिसूचनेची अंमलबजावणी झाली पाहिजे, असंही जरांगे यांनी सांगितलं आहे.

यावेळी बोलताना जरांगे यांनी साल्हेर किल्लाजवळ ताफ्यात ब्रेक फेल झालेले पिकअपसारखे वाहन घालून घातपात करण्याचा प्रयत्न करण्यात आला, यावरून गंभीर आरोप मनोज जरांगे-पाटील यांनी केले आहेत. त्या घातपातासाठी कार्यकर्ता कोणी पाठवला होता ते मला माहिती आहे, गृहमंत्र्यांनी म्हटलं आहे, सखोल चौकशी होईल ती चौकशी लवकर करा नाही तर मला नाव सांगायची वेळ येईल असंही यावेळी जरांगे म्हणालेत. तर नाव न घेता त्यांनी यावेळी मंत्री छगन भुजबळ यांच्यावर हल्लाबोल केला आहे.

साल्हेरला कोण आलं होतं, घातपातासाठी कोणता कार्यकर्ता पाठवला होता, मला चांगलंच माहिती आहे, ते वाहन कसं घुसलं ते माहितीये, असं जरांगे यावेळी बोलताना म्हणाले आहेत.