हिंगोलीत व्यापाऱ्यांनी मागितले इच्‍छा दया मरण

हिंगोली: शहरातील रामलीला मैदानावरील फुटकळ व्यापाऱ्यांना लेखी आश्वासनानंतर पर्यायी जागा न दिल्यामुळे व्यापाऱ्यांनी बुधवारी (ता.चार) जिल्‍हाधिकाऱ्यांकडे एका निवेदनाद्वारे इच्‍छा दया मरणाची परवानगी मागितली आहे. 

या बाबत शेख आतीखूर रेहमान, वैजनाथ नागरे, कैलास बांगर, शेख पाशा शेख इसूफ, देवा वाबळे, शेख हमीद, श्याम कुटे, चंद्रकांत घोडेकर, दिनकर तडसे, शेख समद, शेख वसीम, शेख शिखूर, रामू कुरील, गजानन चव्हाण, उत्तम राखुंडे, गणेश भोसले, विठ्ठल गरवारे, रमेश फड, शेख हकीम शेख रशीद, भगवान जाधव यांच्यासह पन्नास ते साठ फुटकळ व्यापाऱ्यांनी जिल्‍हाधिकारी रुचेश जयवंशी यांच्याकडे निवेदन दिले आहे.

हेही वाचा- पहिल्याच पेपरला २६९ परीक्षार्थी अनुपस्थित

यापूर्वी केले होते आंदोलन

रामलिला मैदानावर फुटकळ व्यापाऱ्याचे उदरनिर्वाहाचे साधन अतिक्रमणाच्या नावाखाली उद्ध्वस्त करण्यात आले. त्‍यानंतर सर्व फुटकळ व्यापाऱ्यांनी वारंवार लेखी व तोंडी निवेदन देऊन आंदोलनदेखील केले. या वेळी उपविभागीय अधिकाऱ्यांनी पर्यायी जागा देण्याचे लेखी आश्वासन दिले होते. त्यानंतर प्रशासनावर विश्वास ठेवून हे आंदोलन मागे घेतले होते.

आत्‍महत्या करण्याची आली वेळ

या आश्वासनाला दोन वर्षांचा कालावधी उलटला तरी अद्यापही शहरात कोठेही पर्यायी जागा देण्यात आली नाही. त्‍यामुळे आत्‍महत्या करण्याची वेळ आली आहे. आत्‍महत्या करणे कायद्याने गुन्हा आहे. शासन व प्रशासन आपले लेखी आश्वासन पाळू शकत नसल्यामुळे सामूहिक इच्‍छा मरणाची परवानगी द्यावी, अशी मागणी या निवेदनात फुटकळ व्यापाऱ्यांनी केली आहे.

येथे क्लिक करा - स्‍वच्‍छतेत राज्य राखीव पोलिस बल अव्वल

विजेच्या धक्याने एकाचा मृत्यू

हिंगोली: विद्युत प्रवाह उतरलेल्या शेतातील विद्युत खांबाच्या तणावाला धक्का लागून एकाचा मृत्यू झाल्याची घटना मंगळवारी (ता. तीन) इसापूर रमणा येथे सायंकाळी पाच वाजेच्या सुमारास घडली. पोलिसांनी दिलेल्या माहितीनुसार इसापूर रमणा येथील केशव पुंडलिक वाढवे (वय ४५) हे शेतात काम करीत होते. या वेळी विद्युत प्रवाह उतरलेल्या विद्युत खांबाच्या तणावाला त्यांचा स्पर्श झाला. यात त्यांना विजेचा जोराचा धक्का लागून गंभीर जखमी झाले. बाजूला असलेल्या इतरांनी आरडाओरडा केली असता परिसरातील शेतकरी धावत आले. लाकडाचा आधार देत केशव वाढवे यांना बाजूला केले.

उपचारासाठी रुग्णालयात दाखल

त्यानंतर गणेश जगताप, बालाजी हराळे यांनी तातडीने हिंगोली येथील सामान्य रुग्णालयात उपचारासाठी दाखल केले. परंतु, वैद्यकीय अधिकाऱ्यांनी तपासून त्यांना मृत घोषित केले. पोलिस कर्मचारी प्रवीण राठोड यांनी घटनास्थळी भेट देऊन पंचनामा केला. बुधवारी (ता. चार) सकाळी नऊ वाजता शवविच्छेदन झाल्यानंतर मृतदेह नातेवाइकांच्या ताब्यात दिला. इसापूर रमणा येथे त्यांच्या पार्थिवावर अंत्यसंस्कार करण्यात आले. दरम्‍यान, मयत केशव वाढवे यांच्या पश्चात वडील, पत्‍नी, दोन भाऊ, दोन मुले असा परिवार आहे.