खासदार हेमंत पाटील यांच्या बंडाचे सेनगावात पडसात शिवसेनेच्या वतीने खासदाराच्या प्रतिकात्मक पुतळ्याचे दहन

सेनगाव (जि.हिंगोली) : कालपर्यंत माजी मुख्यमंत्री उद्धव ठाकरे यांच्यासोबत एकनिष्ठ असलेले हिंगोली लोकसभेचे खासदार हेमंत पाटील देखील आता शिंदे गटात सामील झाल्यामुळे सेनगाव शहरात खासदार हेमंत पाटील यांचा प्रतिकात्मक पुतळा मंगळवारी ता. १९ जाळण्यात आला आहे. विधान परिषदेचे मतदान झाल्यानंतर शिवसेनेमध्ये दोन गट पडले. शिवसेनेचे नेते एकनाथ शिंदे यांनी शिवसेनेसोबत बंड करून तब्बल ४० आमदार फोडले. यानंतर त्यांनी धनुष्यबाण चिन्हासाठी १२ खासदाराचा गट देखील फोडला असून यामध्ये खा.हेमंत पाटील हे देखील शिंदे गटात सामील झाल्याची बातमी पसरली. यामुळे जिल्हाभरातून शिवसैनिकांतुन निषेध व्यक्त करण्यात येत आहे.

बांगर पाठोपाठ काही दिवसातच खासदार हेमंत पाटील सुध्दा शिंदे गटाच्या बाजूने गेल्याचे दिसून आले आहे. त्यामुळे एका पाठोपाठ होत असलेले बंड हे निष्ठावान शिवसैनिकांना मान्य नसल्यामुळे मंगळवारी सेनगाव येथील तहसील कार्यालयासमोर खासदार हेमंत पाटील यांच्या प्रतिकात्मक पुतळ्याचे शिवसैनिकांकडून दहन करण्यात आहे. यावेळी रणजित देशमुख दिलीपराव कुंदरगे,जगदीश गाढवे तालुकाप्रमुख युवासेना,करण देशमुख,प्रविण महाजन,गंगाराम फटांगळे, दिगंबर देशमुख,निलेश राठोड,वसंता कुंदर्गे,फेरोज पठाण ,सचिन जाधव,विलास सुतार आदीसह कार्यकर्त्यांची उपस्थिती होती.