'मराठा समाजाला कायमचं आरक्षण द्यायचं असेल, तर त्यांचं वेगळं ताट दिलं पाहिजे'; आरक्षणावर प्रकाश आंबेडकरांचं मोठं विधान

अंकुशनगर : ओबीसीचं आरक्षण (OBC Reservation) ओबीसींनाच असलं पाहिजे ही भूमिका आम्ही घेणार आहोत. सध्या तणाव निर्माण झाला असून शासनाला माझी विनंती आहे की, हा तणाव मर्यादेच्या पलीकडे जाता कामा नये, असं स्पष्ट मत अॅड. प्रकाश आंबेडकर यांनी व्यक्त केले.

आमरण उपोषणाच्या आठव्या दिवशी अॅड. प्रकाश आंबेडकर (Adv. Prakash Ambedkar) यांनी आंदोलक लक्ष्मण हाके व नवनाथ वाघमारे यांची भेट घेतली. यादरम्यान त्यांना पाणी पिण्याचा आग्रह केला, यावेळी आंबेडकरांच्या आग्रहानंतर हाके व वाघमारे यांनी पाणी पिले.

'भटक्या विमुक्तांना शाश्वत आरक्षण निघून जाते की काय याची भीती आहे. याबाबत शासनाने चर्चा केली पाहिजे. शासनाने लवकरात लवकर याकडे लक्ष घालावं. शासन लक्ष घालेलं अशी अपेक्षा करतो. राजकीय सत्ता सार्वत्रिक झाली तर समाजामधला सलोखा कायम राहतो. आमची भूमिका अगोदर जाहीर केली आहे. एखादी व्यवस्था शाश्वत झालेली आहे, त्याच्यामध्ये कोणालातरी घुसडण्याचा प्रयत्न केला, तर मग सामाजिक दृष्टीने असणारा सलोखा बिघडला जातो.'

आंबेडकर पुढे म्हणाले, 'मराठा समाजासाठी कायम आरक्षण द्यायचं असेल तर त्यांचे वेगळे ताट दिले पाहिजे. संविधानावरती ओबीसींनी विश्वास ठेवला आहे. हा सर्वात मोठा आरक्षण वाचवण्याचा भाग असू शकतो, असं मला वाटतं.'