स्वामी विवेकानंद शिक्षण संस्थेकडून एक कोटीची मदत

उस्मानाबाद : कोरोनाविरुद्धची लढाई जिंकण्यासाठी महाराष्ट्र शासन वेगवेगळ्या उपाययोजना करीत आहे. या पार्श्वभूमीवर केलेल्या लॉकडाऊनमुळे राज्यासमोर मोठे आर्थिक संकट उभे राहिले आहे. राज्यातील आर्थिक व्यवस्था ठप्प झाली आहे. अशा परिस्थितीत स्वामी विवेकानंद शिक्षण संस्थेच्या (कोल्हापूर) शिक्षक, शिक्षकेतर कर्मचाऱ्यांचे एक दिवसाचे वेतन म्हणजे सुमारे एक कोटी रुपयांची मदत मुख्यमंत्री सहायता निधीमध्ये जमा करण्याचा निर्णय संस्थेचे कार्याध्यक्ष प्राचार्य अभयकुमार साळुंखे यांनी मंगळवारी (ता. ३१) घेतला आहे.

यासंदर्भात संस्थेचे मराठवाडा विभागप्रमुख, व्यवस्थापन समितीचे सदस्य व उस्मानाबाद येथील रामकृष्ण परमहंस महाविद्यालयाचे प्राचार्य डॉ. जयसिंगराव देशमुख यांनी मंगळवारी (ता. ३१) प्रसिद्धिपत्रकात म्हटले आहे, की देशावर किंवा राज्यावर अशा प्रकारच्या आपत्ती आल्या, त्या-त्या वेळी स्वामी विवेकानंद शिक्षण संस्था नेहमीच मदतीकरिता उभी राहिली आहे. संस्थेचे संस्थापक शिक्षणमहर्षी डॉ. बापूजी साळुंखे यांनी संस्थेला दिलेल्या तत्त्वानुसार आपल्या उत्पन्नातील काही वाटा समाजाकरिता खर्च करणे हे प्रत्येकाचे नैतिक कर्तव्य आहे.

औरंगाबादच्या इतर बातम्या वाचण्यासाठी - क्लिक करा

मराठवाड्याच्या इतर बातम्या वाचण्यासाठी - क्लिक करा

डॉ. बापूजी साळुंखे यांच्या विचारांना समोर ठेवूनच आजपर्यंत संस्थेने वेळोवेळी भूकंपग्रस्त, पूरग्रस्त, दुष्काळग्रस्त लोकांसाठी स्वयंस्फूर्तीने मदत केली आहे. आज कोरोनाच्या जागतिक महामारीचा सामना राज्य सरकार धैर्याने आणि कौशल्याने करीत आहे. अशावेळी शिक्षणक्षेत्रातील व्यक्तींनी यासाठी आपले योगदान देणे ही काळाची गरज आहे.

अशा परिस्थितीत सामाजिक जबाबदारीच्या जाणिवेतून संस्थेतील सर्व शिक्षक व शिक्षकेतर कर्मचाऱ्यांनी एक दिवसाचे वेतन दिले असून, संस्थेने सुमारे एक कोटी रुपये धनादेशाद्वारे मुख्यमंत्री सहायता निधी- कोविड-१९ मध्ये जमा करण्याचा निर्णय घेतला आहे. संस्थेचे कार्याध्यक्ष प्राचार्य अभयकुमार साळुंखे यांनी एका परिपत्रकाद्वारे ही माहिती दिली आहे, असे प्राचार्य डॉ. देशमुख यांनी सांगितले.