पवित्रेश्वर मंदिर परिसर नटला हिरवळीने 

हिंगोली: पोतरा (ता. कळमनुरी) येथील पवित्रेश्वर महादेव मंदिराच्या माळरानावरील कडूनिंबाचे वन व बालउद्यान भाविकांसह बच्चे कपंनीचे आकर्षण ठरत आहे. हा परिसर हिरवळीने नटला आहे. त्यामुळे परिसरातील शाळा, महाविद्यालयांच्या सहली येथे दाखल होत असून येथील प्रतिध्वनींचा आनंद लुटण्यासाठी युवकही गर्दी करत आहेत.

पोतरा(ता. कळमनुरी) येथे पवित्रेश्वर महादेव मंदिराचा ८५ एकरचे माळरान आहे. या माळरानावर पक्षाच्या विष्टेपासून कडूनिंबाची चार ते पाच हजार झाडे निसर्गतः च तयारी झाली आहेत. त्‍याला कोटरी बिऱ्हाटीच्या रोपट्यांचे सरंक्षण झाले आहे. तसेच गावकऱ्यांनी येथे कुऱ्हाड बंदी, गुराई बंदी, चराई बंदी आदी उपक्रम राबविल्याने वृक्षसंवर्धनास मदत झाली आहे. तसेच सामाजिक वनिकरण विभागातर्फे रोपट्यांचे संगोपन केल्याने रोपट्यांचे रुपांतर झाडात झाले आहे.

हेही वाचा- Republic Day 2020- पारदर्शक कर्जमुक्तीमुळे शेतकरी चिंतामुक्त- वर्षा गायकवाड

विविध वन्यप्राण्यांचे वास्तव्य

 येथे अनेक प्राणी वास्‍तव्यास येत आहेत. यात मोर, ससे, कोल्‍हे या प्राण्याची संख्या मोठ्या प्रमाणावर आहे. सध्या या माळरानावर सामाजिक वनिकरण विभागातर्फे चार हजार रोपट्यांची लागवड करण्यात आली असून बोअरवेल घेवून ठिबकद्वारे प्रत्‍येक रोपट्यांना पाणी दिले जात आहे. त्‍याच्या देखभालीसाठी दोन कर्मचाऱ्यांची नियुक्ती करण्यात आली आहे. तसेच माळरानावर जाण्यासाठी गट्टूच्या पायऱ्या, विसाव्यासाठी निवारे, कडूनिंबाच्या वृक्षाच्या बुडाला ओटे तयार करण्यात आले आहेत. 

बालउद्याने ठरतेय आकर्षण

येथे लावण्यात आलेल्या वृक्षात वड, आंबा, चिंच, निंब, चिकू, बदाम आदी जातींच्या वृक्षांसह विविध फळ व फुलांच्या झाडांचा समावेश आहे. पवित्रेश्वराच्या दर्शनासाठी येणाऱ्या भाविकांचे सध्या हे वन आकर्षण ठरत आहे. तसेच येथे बच्चे कंपनीसाठी सामाजिक वनिकरण विभागातर्फे बालउद्यान उभारण्यात आले आहे. यामध्ये विविध प्राण्यांच्या प्रतिकृती, घसरगुंडी, लॉन, बच्चे कंपनीसाठी असलेले खेळाचे साहित्यांचा समावेश आहे. त्यामुळे येथे भाविकांसह पर्यटकांची संख्या वाढली आहे. 

यावरही क्लिक करा- कोरड्या बंधाऱ्याकडे पाहण्याची आली वेळ

शाळा, महाविद्यालयाच्या सहली दाखल
 
परिसरातील शाळा, महाविद्यालयातील सहल येथे दाखल होत असून या माळरानावरून मोठा आवाज काढल्यानंतर त्‍याचा प्रतिध्वनी ऐकावयास मिळत आहे. प्रतिध्वनी ऐकण्यासाठी अनेक युवक येथे गर्दी करत आहेत. वृक्षसंवर्धनामुळे परिसरातील विहीरी व विंधन विहीरीच्या पाणी पातळीत वाढ होण्यास मदत झाली आहे. तसेच जमिनीपासून महादेव मंदिर व उद्यानाचा भाग उंच टेकडीवर आहे. तरीही बोअरवेलची पाणी पातळी समाधान कारक आहे.

निसर्गरम्‍य परिसर पाहण्यासाठी गर्दी

पवित्रेश्वर महादेवाच्या माळरानावर वन तयार झाले आहे. यासाठी सामाजिक वनिकरण विभागाने पुढाकार घेतला असून हे उद्यान पर्यटकांचे आकर्षण ठरत आहे. अनेक शालेय सहली दाखल होत आहेत. तसेच निसर्गरम्‍य परिसर पाहण्यासाठी देखील मोठी गर्दी होत आहे.
-विजय मुलगीर, सामाजिक कार्यकर्ते