शेतकऱ्यांच्या अडचणीत वाढ, सोयाबीन पिकात किडरोगांचा प्रादुर्भाव

परभणी: जिल्ह्यातील सोयाबीन पिकात किडी व रोगाचा प्रादुर्भाव दिसून आला आहे. वसंतराव नाईक मराठवाडा कृषि विद्यापीठ आणि कृषि विभाग यांच्‍या पथकांनी सोमवारी (ता. नऊ) जिल्‍ह्यातील राहटी व कात्‍नेश्‍वर शिवारातील शेतकऱ्यांच्या सोयाबीन पिकांची पाहणी केली. या पथकात विद्यापीठातील सोयाबीन पैदासकार डॉ. शिवाजी मेहत्रे, कृषि विद्यावेत्‍ता डॉ. गजानन गडदे, मृदा शास्‍त्रज्ञ डॉ. रामप्रसाद खंदारे, वनस्‍पती रोग शास्‍त्रज्ञ डॉ. विक्रम घोळवे, किटक शास्‍त्रज्ञ डॉ. राजेंद्र जाधव तसेच कृषि विभागाचे जिल्हा अधिक्षक कृषि अधिकारी संतोष आळसे व तालुका कृषि अधिकारी परभणी प्रभाकर बनसावडे आदीचा समावेश होता.

या पथकांनी सोयाबीन पिकांची पाहणी केली असता काही ठिकाणी कीड व रोगाचा प्रादुर्भाव दिसून आला. या पाहणी दरम्‍यान अनेक ठिकाणी जस्त व लोहची कमतरता आढळून आली. त्यामुळे सोयाबीनची पाने पिवळसर दिसत आहेत. जुलै महिन्यामध्ये झालेली अतिवृष्टी व त्यानंतर पावसाचा पडलेला खंड, वाढलेले तापमान त्याच बरोबर दिवस व रात्र या मधील तापमानाची तफावत यामुळे सोयाबीन पिकावर मावा, तुडतुडे व पांढरीमाशी यांचा प्रार्दुभाव सुरु झालेला दिसून येत आहे.

विषाणुजन्य रोगांचा प्रसार होण्याची शक्यता

पुढे असेच वातावरण राहिल्यास रसशोषण करणाऱ्या किडींचा मोठया प्रमाणावर प्रादुर्भाव होऊन सोयाबीन माझॅक व पिवळा मोझॅक या विषाणुजन्य रोगांचा प्रसारण होण्याची शक्यता असल्‍याचे शंका व्‍यक्‍त केली. काही भागात सध्या सोयाबीन पिकावर खोडमाशी, चक्रीभुंगा व पाने खाणाऱ्या अळया या किडींचा देखिल प्रादुर्भाव दिसुन येत आहे. सोयाबीन पिकांवरील कीड व रोग प्रादुर्भाव पाहता विद्यापीठ शास्‍त्रज्ञांनी पुढील उपाय योजना करण्‍याचा सल्‍ला दिला आहे.

या आहेत उपाययोजना

- चिलेटेड झिंक व लोह यांची प्रत्येकी ५० ग्रॅम प्रति दहा लीटर पाण्यामध्ये घेवुन फवारणी करावी

- विद्राव्य सुक्ष्मअन्नद्रव्ये ग्रेड-२ ची ५० मिली प्रति दहा लीटर पाणी या प्रमाणात फवारणी घ्यावी.

- सोयाबीन पीकात एकरी १५ पिवळे व ५ निळे चिकट सापळे लावावे,

- इंग्रजी टि आकाराचे २० पक्षी थांबे उभारावे

- एकरी चार कामगंध सापळे लावावे