Hingoli Student Strike : ‘आम्हाला शिक्षक द्या’ सीईओंच्या दालनात पुसेगावच्या विद्यार्थ्यांचा ठिय्या

Hingoli News : सेनगाव तालुक्यातील पुसेगाव येथील जिल्हा परिषदेच्या उर्दू शाळेत शिक्षकांच्या चार जागा रिक्त असल्याने विद्यार्थ्यांचे नुकसान होत आहे. रिक्त जागा तत्काळ भरण्याच्या मागणीसाठी विद्यार्थ्यांसह पालक, शिवसेनेच्या (उबाठा) पदाधिकाऱ्यांनी सोमवारी (ता. एक) थेट सीईओंच्या दालनात ठिय्या आंदोलन केले.

शिक्षणाधिकारी यांनी एका शिक्षकाची तत्काळ नियुक्ती करीत दुसरा एक शिक्षक पंधरा दिवसांत देण्याचे आश्वासन दिल्यानंतर हे आंदोलन मागे घेण्यात आले. सेनगाव तालुक्यातील पुसेगाव येथे जिल्हा परिषदेची उर्दू शाळा आहे.

पहिली ते सातवीपर्यंत वर्गांत एकूण २२० विद्यार्थी शिक्षण घेतात. या विद्यार्थ्यांना शिकविण्यासाठी दहा शिक्षकांची पदे मंजूर आहेत; मात्र शाळेत सध्या केवळ चारच शिक्षक कार्यरत आहेत. यापैकी एक शिक्षक तर नऊ वर्षांपासून आॅनलाइन काम करीत असल्याचा आरोप पालकांनी केला आहे.

दरम्यान या संदर्भात वेळोवेळी निवेदन देऊन देखील काही उपयोग झाला नाही. त्यामुळे विद्यार्थी, पालक व शिवसेना (उबाठा) शेतकरी सेनेचे प्रदेश संघटक वसीम देशमुख, माजी जिल्हा परिषद सदस्य विठ्ठल चोतमल यांनी सोमवारी जिल्हा परिषदेचे मुख्य कार्यकारी अधिकारी अनुप शेंगुलवार यांच्या दालनात शाळा भरवत ‘आम्हाला शिक्षक द्या’ म्हणत ठिय्या केला.

शिक्षकाअभावी विद्यार्थ्यांचे नुकसान होत असल्यामुळे शिक्षकांची नियुक्ती करण्याची मागणी केली. यावेळी शिक्षणाधिकारी संदीप सोनटक्के यांनी पुसेगाव जिल्हा परिषद ऊर्दू येथे शिक्षकांची व्यवस्था करण्यात येईल, असे सांगितले.

मात्र आम्हाला आताच शिक्षक द्या, अशी मागणी आंदोलनकर्त्यांनी लावून धरल्याने त्यानंतर शिक्षणाधिकारी सोनटक्के यांनी तातडीने एका शिक्षकांची नियुक्ती केली. तसेच एक शिक्षक पंधरा दिवसांत देणार असल्याचे लेखी आश्वासन दिल्यानंतर विद्यार्थी, पालक व शिवसेना पदाधिकाऱ्यांनी दालन सोडले. यावेळी शिवसेनेचे प्रदेश संघटक देशमुख यांच्यासह जिल्हा परिषदेचे माजी सदस्य विठ्ठल चौतमाल यांच्यासह पालक, विद्यार्थी मोठ्या संख्येने उपस्थित होते.