वाचा : का आहेत रब्बी पिके संकटात...

परभणी : जिल्ह्यातील परभणीसह पाथरी, मानवत, सोनपेठ, गंगाखेड, पालम या सहा तालुक्यांत रविवारी रात्री (ता. दोन) नऊच्या सुमारास अवकाळी पावसाने जोरदार हजेरी लावत रब्बी पिकांना संकटात टाकले आहे. त्यामुळे गहू, ज्वारीसह तूर पिकाचे नुकसान झाले आहे.

मागील काही दिवसांपासून वातावरणात सातत्याने बदल होत आहे. ढगाळ वातावरण राहत असल्याने दिवसभर अंधारून येत आहे. रविवारीदेखील सकाळपासून ढगाळ वातावरण तयार झाले होते. पहाटे काही भागात अंधारून आले होते. दिवसभर ढगाळ कायम राहिले. सायंकाळी काळेकुट्ट ढग जमा होऊन सात वाजता काही जिल्ह्यांतील भागात जोरदार पाऊस झाला.

सुमारे १५ मिनिटे पाऊस सुरू राहिल्याने सर्वत्र पाणीच झाले. पाऊस काही वेळ थांबल्यानंतर पुन्हा रात्री नऊच्या दरम्यान, पावसाला सुरवात झाली. परभणी शहरात पावसाचा जोर अधिक होता. ग्रामीण भागातदेखील पावसाचा जोर राहिला. या पावसामुळे शहरातील वीजपुरवठा खंडित झाला होता. पावसाचा जोर अधिक असल्याने काही वेळातच शहरातील रस्त्यांवरून पाणी वाहू लागले. नाल्यादेखील तुडुंब भरून रस्त्यांवरून वाहत होत्या. सोमवारीदेखील अनके रस्त्यांवर पाणी साचलेले होते. 

हेही वाचा - भाजप जिल्हाध्यक्ष निवडीवरुन परभणीत गोंधळ !

पावसाची मंडळनिहाय नोंद

परभणी शहरात १२, ग्रामीणमध्ये सात, झरी, दैठणा, पेडगाव, सिंगणापूर या मंडळांत एक मिलीमीटर पाऊस झाला. पालम तीन, चाटोरी दोन, बनवस पाच, गंगाखेड एक, राणीसावरगाव एक, माखणी १६, महातपुरी दोन, बाभळगाव एक, केकरजवळा पाच, असा एकूण सरासरी १.६६ मिलिमीटर पावसाची नोंद झाली आहे.

हरभरा पिकावर घाटेअळीचा प्रादुर्भाव

सध्या रब्बी हंगामातील पिके जोमात असून तूर पिकाची काढणी सुरू आहे. तर ज्वारी पोटऱ्यात आली आहे. गहूदेखील वाढीला लागलेला आहे. अशा अवस्थेत वातावरण मात्र, सातत्याने बदलत आहे. ढगाळ वातावरण सातत्याने राहत असल्याने हरभरा पिकावर घाटेअळीचा प्रादुर्भाव होत आहे.

वाचा - या आरोपींना पोलिस कोठडी

शेतकरी तूर काढत असताना पावसाने गोंधळ निर्माण केला आहे. रविवारी आलेल्या पावसामुळे कापणी करून ठेवलेली तूर भिजली आहे. पावसाचा पुन्हा अंदाज पाहता शेतकऱ्यांनी सोमवारी कापणी केलेली तूर सुरक्षित ठिकाणी हलविण्याची घाई केल्याचे दिसून आले.

बहुतांष ठिकाणी ज्वारीचे कणसे भरण्याची अवस्था आहे. अशा वेळी पाऊस होत असल्याने ज्वारी काळी पडण्याची भीती निर्माण झाली आहे. तसेच वारा आल्यास ज्वारी आडवी होण्याची भीती आहे. अनेक शेतकऱ्यांनी लवकर पेरणी केलेल्या गव्हालादेखील फटका बसण्याची शक्यता आहे.