Marathwada Rain Update: पिकांसह शेतकऱ्यांचे चेहरेही टवटवीत

औरंगाबाद: मोठ्या खंडानंतर नांदेड, लातूर, परभणी, हिंगोली आणि औरंगाबाद जिल्‍ह्यातील काही भागात पाऊस झाला. या श्रावणसरीमुळे पिकांसह शेतकऱ्यांचे चेहरेही टवटवीत झाले. परभणी जिल्ह्यात रविवारी (ता.१५) रात्री पावसाचे आगमन झाले. जिल्ह्यातील सर्वच तालुक्यांत कमी अधिक प्रमाणात पाऊस झाला. दरम्यान, या पावसामुळे जिल्ह्यातील सोयाबीनसह इतर पिकांना जीवदान मिळाले.

हिंगोली जिल्ह्यात सोमवारी (ता. १६) भल्या पहाटे पाऊस झाला. त्यामुळे शेतकऱ्यांना दिलासा मिळाला आहे. दरम्यान, नांदेड आणि लातूर जिल्ह्यातील काही भागात पाऊस झाला. औरंगाबाद शहरासह जिल्ह्यातील काही भागात सोमवारी (ता. १६) रात्री रिमझिम पाऊस झाला.

तीन जिल्ह्यांत प्रतीक्षाच
बीड, जालना आणि उस्मानाबादमध्ये पावसाची प्रतीक्षा कायम आहे. अनेक दिवसांपासून पाऊस नसल्याने खरीप पीक सुकले आहे. त्यामुळे आता पाऊस आला तरी उत्पन्नात घट होणार हे निश्चित आहे. पण, तीन-चार दिवसांत पाऊस झाला नाही तर पीक हातचे जाणार आहे.