संचारबंदी शिथील होताच उसळली गर्दी

परभणी : तीन दिवसाच्या संचारबंदीनंतर शिथिलता देताच  शहरात सोमवारी (ता. २०) सकाळपासून गर्दी उसळली. लॉकडाउनचे कोणतेही नियम न पाळता किराणा, भाजीपाला खरेदीसाठी लोकांची झुंबड उडाल्याचे चित्र दिसून आले. दुपारी दोन वाजेपर्यंत सूट दिल्याने दुपारपर्यंत गर्दी कायम होती. एकप्रकारे नागरिकांनी कोणत्याप्रकारे भान न ठेवता गर्दी केली.

परभणीत कोरोचा पहिला रुग्ण आढळल्यानंतर परभणीत शुक्रवार (ता. १७) पासून तीन दिवस संचारबंदी लागू करण्यात आली होती. त्यामध्ये फळे, भाजीपाला, दूध यांनाही बंदी घातली होती. त्यानंतर दुसऱ्या दिवशी शनिवारी केवळ दूध विक्रेत्यांना घरोघरी दूध विक्री करण्याची मुभा दिली होती. तर भाजीपाला, फळे, किराना दुकाने बंद होती. त्यामुळे संपूर्ण शहरात सन्नाटा पसरला होता. रविवारी रात्री उशिरा जिल्हा प्रशासनाने दूध, फळे, भाजीपाला, किराना  व अत्यावश्यक सेवा सकाळी सात ते दुपारी दोन वाजेर्यंत सुरू राहणार असल्याचे जाहीर केले. त्यामुळे पहाटे सहा वाजल्यापासून शहरात सगळीकडे गर्दी दिसून आली.

 हेही वाचा - ‘त्या’ रुग्णाची प्रकृती स्थिर
 

हातगाडे येण्यास सुरवात

पाथरी रस्त्यावरील भाजीपाला मार्केट सुरू झाल्याने सकाळी सात वाजल्यापासून शहरातील मुख्य रस्त्यावर अंतर्गत वसाहतीमध्ये हातगाडे येण्यास सुरवात झाली. शहराच्या मुख्य बाजारपेठेतदेखील हातगाड्यावर भाजीपाला विक्रीस सुरू होताच मोठी गर्दी उसळली. नारायणचाळ, स्टेशन रस्ता, गव्हाणे चौक, गांधी पार्क आदी भागात गर्दी दिसून आली. वसमत रस्त्यावर अनेक ठिकाणी गर्दी होती.

हेही वाचा व पहा - कोरोनाच्या लढ्यात डॉ. रमण गंगाखेडकर यांनी फडकवला नांदेडचा झेंडा...

 
कृषी केंद्राची दुकाने बंद
देशमुख हॉटेल परिसरात व्यापाऱ्यांनी भाजीपाला विक्री केली. या ठिकाणीदेखील कोणतेही नियम न पाळता मोठी झुंबड उडाली. परभणी शहरातील कच्छी लाईन भागात किराणा दुकाने उघडताच तुफान गर्दी उसळली. प्रत्येक दुकानावर गर्दीच दिसून आली. रस्ते पूर्णत: गजबजून गेल्याने पायी चालताना कसरत करावी लागत होती. त्यासोबतच नवा मोंढा परिसरात असलेल्या होलसेल किराणा दुकानासमोर तोबा गर्दी झाली होती. हा परिसरदेखील गजबजून गेला होता. मोंढ्यात केवळ भुसार मालाची दुकाने सुरू होती. कृषी केंद्राची दुकाने बंद होती.