Samurdhi Mahamarg : हर्सूल सावंगी जवळ ट्रक-खुराणा ट्रॅव्हल्सची धडक... समृद्धी महामार्गावर अपघातांची मालिका सुरूच!

विकास देशमुख

छत्रपती संभाजीनगर : समृद्धी महामार्गावर अपघातांची मालिका सुरूच आहे. आज पहाटे चार वाजताच्या सुमारास येथील हर्सूल सावंगी येथील गेट क्रमांक 16 जवळ खुराणा ट्रॅव्हल्स कंपनीची खासगी बस आणि ट्रकची धडक झाली. यात बसचा अक्षरशः चुराडा झाला. या दुर्घटनेत 20 प्रवासी जखमी झाले.

सुदैवाने यात कुणाला गंभीर इजा झाली नाही. सर्वांची प्रकृती स्थिर आहे. जखमींपैकी नऊ जणांवर प्राथमिक उपचार करून करून त्यांना घरी सोडण्यात आले. उर्वरित 11 जणांवर शासकीय वैद्यकीय महाविद्यालयात (घाटी) उपचार सुरू आहेत.

समृद्धी महामार्गावर दर दोन-तीन दिवसाला कुठे ना कुठे अपघात होत आहे. आतापर्यंत बुलडाणा जिल्ह्यात सर्वाधिक अपघात झाले. त्या पाठोपाठ छत्रपती संभाजीनगर जिल्ह्याच्या हद्दीत अपघात झाले. आज पहाटे चार वाजण्याच्या सुमारास एक ट्रक आणि बसची धडक झाली. अपघात एवढा भीषण होता की परिसरामध्ये मोठा आवाज झाला. यामुळे परिसरातील नागरिकांमध्ये भीतीचे वातावरण निर्माण झाले होते.

आवाज ऐकताच नागरिक आणि पोलिसांच्या मदतीने जखमींना घाटी रुग्णालयामध्ये दाखल करण्यात आले. जखमी 20 जणांपैकी नऊ जणांना किरकोळ मार लागला होता‌. त्यांच्यावर प्राथमिक उपचार करून त्यांना घरी सोडण्यात आले. उर्वरित 11 जणांवर उपचार सुरू आहेत.

नागपूरवरून येत होती बस

अपघातग्रस्त बस ही नागपूरहून छत्रपती संभाजीनगरकडे येत होती. येथील हर्सूल सावंगी येथील गेट क्रमांक 16 जवळ खुराणा ट्रॅव्हल्स कंपनीची खासगी बस आणि ट्रकची धडक झाली. यात बससह ट्रकचेही मोठे नुकसान झाले.

‌..