Hingoli Crime : व्यावसायिक अपहरणप्रकरणी सहा जणांना अटक; आरोपींना मोक्का लावणार एसपी कोकाटेंची माहिती

हिंगोली : जिल्ह्यातील कांडली फाटा येथून व्यापाऱ्याचे अपहरण करण्यात आले होते. या प्रकरणात पोलिसांनी कर्नाटक, तेलंगणात जबरी चोरी, खूनाचा प्रयत्न करणाऱ्या सहा अट्टल गुन्हेगारांना अटक केली असून त्यांच्याकडून एक कार, दोन पिस्टल व ९ मोबाईल जप्त केले. त्यांना मोक्का लावण्यासाठी प्रयत्न करणार असल्याची माहिती पोलिस अधिक्षक श्रीकृष्ण कोकाटे यांनी शनिवारी (ता. पाच) पत्रकार परिषदेत दिली.

येथील पोलिस अधिक्षक कार्यालयात आयोजित पत्रकार परिषदेस अप्पर पोलिस अधिक्षक अर्चना पाटील, गुन्हे शाखेचे निरीक्षक विकास पाटील, विष्णुकांत गुट्टे, सहाय्यक पोलिस निरीक्षक शिवसांब घेवारे, राजेश मलपिल्लू यांची उपस्थिती होती.

आडा येथील गणपतराव शिंदे यांचे खंडणीसाठी अपहरण झाल्याचे लक्षात आल्यानंतर सात पथके तयार केली. या पथकाकडून राष्ट्रीय महामार्गावरील सर्व कॅमेऱ्याचे फुटेज तपासले, त्यानंतर मोठ्या शहरात जाणारे व शहरातून बाहेर जाणाऱ्या रस्त्यावरील सीसीटीव्ही फुटेज तपासल्यानंतर काही संशयित वाहने दिसली.

त्यानंतर किमान ३०० पेक्षा अधिक मोबाईलचे कॉल डिटेल्स तपासल्यानंतर संशयितांची नावे समोर आली. त्यानंतर तपासासाठी पथके छत्रपती संभाजीनगरकडे रवाना केली. त्या ठिकाणावरून माहिती घेत पोलिसांच्या पथकाने दौलताबाद शिवारात जाऊन व्यापाऱ्याची सुखरूप सुटका केली.

यावेळी पोलिस व अपहरणकर्त्यांमध्ये झटापट झाली. यामध्ये पोलिसांनी सुरजसिंग ऊर्फ सुरेंद्रसिंग गाडीवाले, राधेश्याम भालेराव (रा. नांदेड), शेख तौसीफ शेख समीर, सईद शाकेर अली, शेख नजीर (रा. छत्रपती संभाजीनगर), मुदस्सर हुसेन (रा. खलवट चारमिनार, हैद्राबाद) यांना अटक केली आहे.

त्यांच्याकडून एक कार, दोन पिस्टल व १ जिवंत काडतूस व ९ मोबाईल असा १५ लाखांचा मुद्देमाल जप्त केला आहे. इतर आरोपींचा शोध सुरु असल्याचे पोलिस अधिक्षक कोकाटे यांनी सांगितले.

आरोपींवर तेलंगणा, कर्नाटक, नांदेड या भागात जबरी चोरी, खुनाचा प्रयत्न करण्याचे गुन्हे आहेत. गुन्हेगारांची ही आंतरराज्य टोळी असून त्यांनी या घटनेपूर्वी तीन दिवस आधी शिंदे यांच्या दुकानाची रेकी केली होती. त्यानंतर आरोपींनी एकत्र येऊन अपहरण केल्याचे स्पष्ट झाले आहे. या आरोपींवर मोक्का लावण्यासाठी प्रयत्न करणार असल्याचे पोलिस अधीक्षक कोकाटे यांनी सांगितले.