शिरडशहापूर येथे व्यापाऱ्याच्या डोळ्यात तिखट टाकून तीन लाख लंपास

शिरड शहापूर ( जिल्हा हिंगोली ) : औंढा नागनाथ तालुक्यातील शिरडशहापूर येथे व्यापाऱ्याच्या डोळ्यात तिखट टाकून तीन लाख दहा हजार रुपये पळविल्याची घटना शनिवारी (ता. पाच) पहाटे एक वाजताच्या दरम्यान घडली आहे.

याबाबत माहिती अशी की, शिरडशहापूर येथे औंढा- वसमत राज्य मार्गावर कोसलगे यांची श्री वेंकटेश्वर ट्रेडिंग कंपनी या नावाने आडत दुकान आहे. त्यांच्या दुकानावर ट्रकमध्ये हळद भरण्याचे काम चालले होते. नंतर रात्री साडेअकरा वाजता हळदीने भरलेला ट्रक रवाना करुन व्यापारी सुभाष उत्तरवार रा. वसमत हे शिरडशहापूर बसस्थानकाजवळ गजू मुकिरवार यांच्या घरी जात असताना घराच्या गेटजवळ अज्ञात व्यक्तीने सुभाष उत्तरवार यांच्या डोळ्यात तिखट टाकून त्यांच्याजवळील तीन लाख १० हजार रुपये असलेली बॅग ज्यामध्ये चोरट्यांनी जबरीने चोरुन नेली.

हेही वाचा - जागतिक पर्यावरण दिन विशेष : वृक्ष लागवडीतून झाडांनाही श्वास देऊयात

सुभाष उत्तरवार यांनी चोरट्यासोबत झटापटसुद्धा केली. तसेच चोरट्यांनी गेट वॉचमेन यांच्या डोळ्यात सुद्धा तिखट टाकले. उत्तरवार यांनी आरडाओरड केली असता घरमालक गजु मुकीरवार हेसुद्धा बाहेर आले. तोपर्यंत चोरटे पैसे घेऊन पसार झाले होते. या घटनेची माहिती मिळताच पोलिस उप अधिक्षक वसीम हाश्मी, कुरुंदा पोलिस ठाण्याचे सहाय्यक पोलिस निरीक्षक सुनील गोपीनवार, हवालदार बालाजी जोगदंड, संतोष पटवे, इम्रान सिद्दिकी यांनी घटनास्थळी धाव घेऊन पसार झालेल्या चोरट्यांचा शोध घेतला. कुरुंदा पोलिस ठाण्यात श्री. उतरवार यांच्या फिर्यादीवरुन जबरी चोरीचा गुन्हा दाखल करण्यात आला आहे.

संपादन- प्रल्हाद कांबळे