आईसोबत कपडे धुण्यासाठी गेलेल्या दोन सख्ख्या बहिणींचा दुर्दैवी मृत्यू

गेवराई (बीड): आईसोबत कपडे धुण्यासाठी गेलेल्या दोन सख्या बहिणींचा गोदावरी नदीत बुडून मृत्यू झाल्याची घटना गेवराई तालुक्यातील राक्षसभुवन येथे शनिवार (ता. 28) ऑगस्ट रोजी दुपारी बारा वाजण्याच्या सुमारास गोदापात्रात घडली. नेहा धर्मराज कोरडे ( वय नऊ) वर्ष व अमृता धर्मराज कोरडे (वय आठ) वर्ष राहणार राक्षसभुवन (ता. गेवराई)अ से मृत्यू झालेल्या मुलींची नावे आहेत. घटनेची माहिती मिळताच चकलांबा पोलिस ठाण्यात सहायक पोलिस निरीक्षक भास्कर नवले यांनी कर्मचाऱ्यांसह घटनास्थळी धाव घेऊन मुलींचे मृतदेह पाण्याबरोबर काढले.

तसेच घटनेचा पंचनामा करुन मृतदेह उत्तरीय तपासणीसाठी प्राथमिक आरोग्य केंद्र उमापुर येथे पाठविण्यात आले. या दुर्दैवी घटनेमुळे सर्वत्र हळहळ व्यक्त होत आहे. गेवराई तालुक्यात काही महिन्यापूर्वी देखील मिरगाव, संगमजळगाव येथे धुणे धुण्यासाठी गेलेल्या मुलींचे गोदावरी नदीत बुडून दुर्दैवी मृत्यू झालेले आहे. त्यातच शनिवारी राक्षसभुवन याठिकाणी देखील घटना घडली आहे.