मुगाला हमीभावापेक्षा दोन हजार रुपये कमी दर

कळंब (जि.उस्मानाबाद) : कृषी उत्पन्न बाजार समितीमध्ये सध्या नव्या मुगाची आवक सुरू झाली असून हिरवागार,चमकदार मूग असतानाही हमीभावा पेक्षा दर कमी मिळत असल्याने शेतकऱ्यामधून नाराजी व्यक्त करण्यात येत आहे.या शेतमालास शासनाने ७ हजार २७५ रुपये प्रतिक्विंटल हमीभाव जाहीर केलेला असतानाही बाजार समितीमध्ये मात्र अधिकाधिक ६ हजार ५०० ते ५ हजार ५०० रुपये प्रतिक्विंटल दराने खरेदी करण्यात येत आहे.चांगल्या प्रतीचा मूग असतानाही दर कमी मिळत असल्याने शेतकऱ्यांचे प्रचंड आर्थिक नुकसान होत आहे.

तालुक्यात प्राथमिक अंदाजानुसार २ हजार हेक्टर क्षेत्रावर मुगाची पेरणी झाल्याचा अंदाज असून खरीप हंगामातील कमी कालावधीचे पीक असलेले मुग आणि उडीदाची काढणी सुरू आहे.मुगाची काढणी झाली असून उडीदाची सुरू आहे.यावर्षी तालुक्यात सर्वदूर आणि मोठा असा पाऊस झाला नाही.मुगाची काढणी भरडणीच्या वेळी पाऊसाने खंड दिला.त्यामुळे या शेतमालाची आवक कृषी उत्पन्न बाजार समितीमध्ये सुरू झाली असून सोमवार (ता.३०) येथील बाजार समितीमध्ये २५१ क्विंटल मुगाची आवक झाली आहे.पावसाच्या अनियमिततेमूळे मुगाच्या उत्पन्नात घट निर्माण झाली आहे.त्यामुळे उत्पन्नात शेतकरी समाधानी नाहीत.त्यातच हमीभावापेक्षा आडत बाजारात मूग या शेतमालाला अत्यल्प दर मिळत असल्याने शेतकरी दुहेरी संकटात आहेत.उत्पन्नात कमालीची घट आलेली असतानाही बाजारात कवडीमोल दराने खरेदी होत आहे. नैसर्गिक आपत्तीने पिचून गेलेल्या शेतकऱ्यांना आडत बाजारात मिळत असलेल्या अल्प दरामुळे या पिकावर केलेला खर्चही वसूल होणे कठीण आहे. शासनाने बाजार समितीवर नियंत्रण ठेवून शेतकऱ्यांच्या शेतमालास हमीदर देण्यासाठी प्रयत्न करावेत अशी मागणी शेतकऱ्यांमधून होत आहे.

चांगल्या प्रतीच्या मुगालाही दर कमीच;

आडत बाजारात मुगाला हमीभावापेक्षा ही कमी दर मिळत आहे. त्यामुळे शेतकऱ्यांमधून नाराजी व्यक्त केली जात असून आडत बाजारात मुग विक्री करण्याचा उद्देश असल्याने शेतकरी चाळून गाळून मूग विक्री करण्यास आणण्यात येतो. यावर्षी पिकावर कसल्याही प्रकारचा रोगाचा प्रादुर्भाव झाला नाही किंबहुना शेतकऱयांनी तो होऊ दिला नाही.त्यामुळे मुग हा शेतमाल हिरवा गार व चमकदार असल्याचे दिसून येते.चांगल्या प्रतीचा शेतमाल असतानाही हमीदरापेक्षा दर कमी मिळत असल्याने शेतकऱ्यांमधून नाराजी आहे