घरी परताना घात! दोघा तरुणांचा मृत्यू, प्रशिक्षणार्थी पोलिस जखमी

केज (जि.बीड) : शहराच्या (Keij) मध्यवर्ती भागातील कानडी रस्त्याजवळ बुधवारी (ता.२२) पहाटे एक वाजण्याच्या सुमारास अज्ञात वाहनाने दुचाकीस धडक दिली. या अपघातात दोघांचा जागीच मृत्यू झाला असून एक प्रशिक्षणार्थी पोलीस शिपाई जखमी झाला आहे. सुजीत सुरेश राऊत (वय २०) व सुमीत संदीपान सिरसाट (वय १८) अशी मृत्यू झालेल्या तरूणांची नावे आहेत. शहरातील फुले नगर (Beed) येथील सुजीत राऊत, सुमीत सिरसट व गडचिरोली येथे पोलीस प्रशिक्षण घेत असलेले समतानगर येथील विजयकुमार पांडुरंग घोळवे हे तिघे बुधवारी पहाटे एक वाजण्याच्या सुमारास (Accident In Beed) दुचाकीवरून (एमएच-४४/एम-२३०३) घराकडे जात होते. ते शहराच्या मध्यवर्ती भागातून जात असलेल्या केज-बीड महामार्गावर कानडी रस्त्यावरील कांचन मेडिकल समोर आले असता एका अज्ञात वाहनाने मागील बाजूने दुचाकीला धडक दिली.

या अपघातात सुजीत राऊत व सुमीत सिरसट यांचा जागीच मृत्यू झाला आहे. तर विजयकुमार घोळवे यांच्या उजव्या पायाला व डोक्याला मार लागून गंभीर जखमी झाले आहेत. अपघातानंतर दुचाकीला मोटारसायकल सुमारे शंभर-दीडशे फूट अज्ञात वाहनाने फरफटत नेले. अपघाताची माहिती मिळताच सहायक पोलीस निरीक्षक‌ संतोष मिसळे, पोलीस उपनिरीक्षक दादासाहेब सिद्धे, रमेश सानप, बाळासाहेब अहंकारे व चालक हनुमंत गायकवाड हे घटनास्थळी दाखल झाले. पोलीसांनी मृत्यू झालेल्या दोघांचे मृतदेह व जखमीस उपजिल्हा रुग्णालयात दाखल केले आहे. हा अपघात मध्यरात्री उशीरा झाल्याने त्यावेळी प्रत्यक्षदर्शी कोणीच नसल्याने हा अपघात नेमका कसा घडला हे जखमी असलेल्या विजयकुमार घोळवे याच्या जबाबावरून उघडकीस येणार आहे.