वसमत तहसीलचा लिपीक निलंबित;  ग्रामपंचायत निवडणुकीचा प्रचार करणे भोवले

शिरडशहापूर ( जिल्हा हिंगोली ) : जानेवारी महिन्यात झालेल्या ग्रामपंचायत निवडणुकीत सोशल मिडीयावरुन औंढा नागनाथ तालुक्यातील सेंदुरसना येथील उमेदवाराचा प्रचार केल्यामुळे वसमत येथील लिपिकास निलंबित करण्यात आले आहे.

जानेवारी महिन्यात औंढा नागनाथ तालुक्यातील सेंदुरसेना येथे ग्रामपंचायतची निवडणूक होती. त्यामध्ये वसमत तहसीलमधील लिपिक ईश्वर ढेकळे हे या कालावधीत वैद्यकीय रजेवर होता. रजेच्या कालावधीत त्यांच्या मूळ गावी राहत असताना सेंदुरसेना ग्रामपंचायत निवडणूकमधील निवडणूक लढविणाऱ्या उमेदवारांच्या नावाचे प्रचारसाहित्य सोशल मिडीयावर स्वत: च्या मोबाइलवरुन प्रसिध्द करुन प्रचार केला होता. तसेच शासकीय कर्मचारी असताना जाणीवपूर्वक बेजबाबदार वर्तन केल्यामुळे त्यामुळे शासनाचे प्रतिमा मलिन झाली असल्यामुळे ईश्वर ढेकळे यांनी महाराष्ट्र नागरी सेवा नियमाचा भंग केल्याने त्यांना निलंबित करणे बाबतचा प्रस्ताव तहसीलदार वसमत यांनी सादर केला होता. त्यानुसार ढेकळे यांना कारणे दाखवा नोटीस देऊन लेखी खुलासा सादर करण्यासाठी कळविण्यात आले होते.

त्यानुसार त्यांनी लेखी खुलासा सादर केला होता. परंतु सदरील खुलासा संयुक्तिक नसल्यामुळे अमान्य करण्यात आला त्यानुसार जिल्हाधिकारी यांनी आदेश काढून सदरील बाब ही गंभीर स्वरुपाची असून महाराष्ट्र नागरी सेवा नियमाच्या विरुद्ध असल्यामुळे  ढेकळे यांना निलंबित करण्याचे आदेश काढले आहेत  व त्यांना निलंबित केलेले आहे.

तसेच हा आदेश अमलात असेपर्यंत तेवढ्या कालावधीत यांना मुख्यालय उपविभागीय अधिकारी वसमत येथे देण्यात आले आहे. त्यांना कार्यालय प्रमुखांची परवानगीशिवाय मुख्यालय सोडता येणार नाही. तसेच निलंबन कालावधीत यांना खाजगी नोकरी इतर व्यवसाय करता येणार नाही असे आदेशामध्ये उल्लेख करण्यात आला आहे.

संपादन- प्रल्हाद कांबळे