राज्यातील पहिल्या उर्दू घराचे उद्‍घाटन कधी होणार?

नांदेड ः राज्यातील पहिले उर्दू घर म्हणून लौकीक असलेल्या नांदेड शहरातील उर्दू घराच्या उद्‍घाटनाला अद्याप वेळ मिळाला नाही. मदिनानगरमध्ये बांधकाम पूर्ण झालेल्या इमारतीत उर्दू भाषेच्या समृद्धीसाठी प्रयत्न होणार आहेत.

भाषेच्या समृद्धीसाठी उर्दू घर
उर्दू भाषेची वाड्मयीन प्रगती व्हावी, मराठी व उर्दू भाषेतील लेखक, कवी, विचारवंत आदी सृजनशील विचारांची देवाणघेवाण व्हावी. या सोबतच उर्दूचा भाषेच्या समृद्धीसाठी उर्दू घराच्या रुपाने एक ठिकाण असावे, या उद्देशाने राज्याच्या अल्पसंख्यांक विकास विभागाकडून ता. चार फेब्रुवारी २०१४ च्या शासन निर्णयानुसार नांदेड शहरातील मदिनानगर येथे उर्दू घर स्थापनेला मंजूरी मिळाली होती. 

साडेसात कोटींचे उर्दू घर
मदिना तुल उलूम शाळेजवळ महापालिकेच्या जागेवर उर्दू घर उभारण्यासाठी तत्कालीन शासनाने आठ कोटी १६ लाख रुपयांच्या खर्चाच्या मान्यता दिली. यानंतर सर्व बाबी पूर्ण करुन मागील वर्षापूर्वी राज्यातील पहिले सुसज्ज असे उर्दू घर अस्तित्वात आले. परंतु यानंतर या वास्तूचे उद्‍घाटन करण्याला अद्याप मुहूर्त मिळाला नाही. यापूर्वी उद्‍घाटनाबाबत अनेकवेळा चर्चा झाली परंतु अद्याप या कामी संबधीतांनी पुढाकार घेतला नाही. या उर्दू घराच्या व्यवस्थापन, देखभाल, दुरुस्ती व कार्यालयीन खर्चासाठी सहा लाख ९४ हजाराचा निधी प्राप्त झाला आहे. यातून आतापर्यंत चार लाख ७७ हजार रुपये खर्च झाले आहेत.

हेही वाचा...विद्यार्थ्यांना का हवा ‘शिवभोजना’चा आधार

विलंबामुळे वास्तुची नासधूस
या वास्तूच्या उद्‍घाटनाला लागलेल्या विलंबामुळे या ठिकाणी आग लागून त्यातील साहित्याची नासधूस झाली होती. यानंतर या उर्दू घराच्या दुरुस्तीसाठी आणि अतिरिक्त कामासाठी जानेवारी २०१९ मध्ये ३८ लाखांचा निधी मिळाला. यातून उर्वरीत कामे अंतिम टप्यात आली असल्याची माहिती नियोजन विभागाकडून मिळाली. परंतु या वास्तुचे उदघाटन करण्यास राज्यकर्त्यांना अद्याप वेळ मिळाला नसल्याने शासनाने ज्या उद्देशाने विशेष बाब म्हणून नांदेडला उर्दू घराची स्थापना केली तो उद्देश सफल होताना दिसत नाही.

हेही वाचलेच पाहिजे....गणित- विज्ञान विषयाच्या भावी गुरुजींना प्रतिक्षा - कशाची ते वाचा

उर्दू अकादमीची मदत घेण्याच्या सूचना
उर्दू घराचे बांधकाम पूर्ण झाल्यानंतर त्याचे उद्‍घाटन मागील काही महिन्यापासून रखडले आहे. याबाबत पालकमंत्री अशोक चव्हाण यांनी दखल घेऊन या उर्दू घराचा उपयोग कसा घेता येईल?, यासाठी मुंबई येथे दिवंगत नेते शंकरराव चव्हाण यांच्या कार्यकाळात स्थापन झालेल्या उर्दू अकादमीची मदत घेण्याची सूचना केली आहे. त्यानुसार येथील कामकाज चालावे, असे त्यांनी सुचित केले आहे.