पैशासाठी नातवाचं राक्षसी कृत्य; अमानुष मारहाण करत आजोबांचा घेतला जीव

मुंबई : वडाळा (Wadala) परिसरात नात्याला काळीमा फासणारी घटना उघडकीस आलीय. येथील एका तरुणानं आपल्या आजोबांसोबत क्रूरतेचा कळस गाठलाय. आरोपीनं अवघ्या 5000 रुपयांसाठी आजोबांचा जीव घेतला असून घरात कुणीही नसताना आरोपीनं आपल्या आजोबांना बांबूच्या काठीनं बेदम मारहाण केलीय. डोक्याला गंभीर दुखापत झाल्यानं आजोबांचा दुर्दैवी मृत्यू (Grandfather Death) झाला आहे. या प्रकरणी वडाळा पोलिसांनी (Wadala Police) गुन्हा दाखल करत फरार झालेल्या नातवाला अटक केलीय.

लक्ष्मण घुगे असं हत्या झालेल्या 75 वर्षीय आजोबांचं नाव आहे. ते मुंबईतील (Mumbai) वडाळा येथील कोरबा मिठागर परिसरात आपली पत्नी आणि मुलासह राहत होते. तर सुशांत राम सातपुते (वय- 21) असं अटक केलेल्या आरोपी नातूचं नाव आहे. काही महिन्यांपूर्वी सुशांतनं आजोबांकडून 5 हजार रुपये उसने घेतले होते. सुशांत बेरोजगार होता आणि ड्रग्जच्या आहारीही गेला होता. 'त्या' दिवशी आजोबांनी पैसे परत करण्याची मागणी केली. यावरून दोघांत जोरदार वाद झाला. सुशांतनं बांबूच्या काठीनं आजोबांना बेदम मारहाण केली आणि दरवाजा बंद करून तिथून तो पळून गेला, असं वरिष्ठ निरीक्षक शशिकांत पवार यांनी सांगितलं.

सुशांतची आजी विमला घरी आल्यावर तिनं घराचा दरवाजा उघडला असता, तिचा नवरा रक्ताच्या थारोळ्यात पडलेला दिसला. तिनं ताबडतोब शेजाऱ्यांची मदत घेत लक्ष्मण घुगे यांना केईएम रुग्णालयात नेलं. संपू्र्ण हकीकत आजीनं पोलिसांना सांगितली. दरम्यान, वडाळा पोलिस ठाण्यात सुरुवातीला खुनाच्या प्रयत्नाचा गुन्हा दाखल करण्यात आला होता. शनिवारी आजोबांचा मृत्यू झाल्यानंतर, खुनाचा गुन्हा दाखल करण्यात आला. पोलिसांनी आरोपीला अटक केलीय.