Mumbai Crime: ते पत्र बनावट? आठही महिला पोलीसांनी बलात्काराची तक्रार न केल्याची दिली स्पष्टोक्ती

मुंबई पोलीस दलातील आठ महिलांकडून पोलीस अधिकाऱ्यांवर गंभीर आरोप करण्यात आल्याचे पत्र चर्चेचा विषय ठरलं होतं. पोलीस उपायुक्तांसह तीन अधिकाऱ्यांकडून मुंबई पोलीस दलातील आठ महिलांवर बलात्कार होत असल्याचा गंभीर आरोप करण्यात आला होता. या आठ महिला याबाबत पोलिसांनी मुख्यमंत्री एकनाथ शिंदे यांना पत्र लिहिल्याच्या बातम्या समोर आल्या होत्या. या घटनेमुळे एकच खळबळ उडाली होती. त्यानंतर आता याबाबत मोठी माहिती समोर आहे.

आठही महिला पोलीस शिपायांनी त्यांच्यासोबत कोणताही गैरप्रकार झाला नसल्याचे तसेच अशी कोणतीही तक्रार न केल्याची स्पष्टोक्ती दिली आहे. आपल्या नावाचा गैरवापर केल्याचा आरोपही महिला पोलीस शिपायांनी केला आहे. मोटर परिवहन विभागातील पोलीस उपायुक्त तसेच दोन पोलीस निरीक्षकांनी आणि त्यांच्या हाताखालील कर्मचाऱ्यांनी बलात्कार तसेच गर्भपात करवल्याचं पत्र सोशल मीडियावर व्हायरल झालं आहे. त्यानंतर एकच खळबळ उडाली होती.

मुख्यमंत्री, उपमुख्यमंत्री तसेच मुंबई पोलीस आयुक्तांना हे पत्र पाठवण्यात आलं होतं. मुंबई पोलिसांनी चौकशीला सुरुवात केली होती. महिला पोलीस शिपायांच्या नावाचा गैरवापर करून बनावट पत्र नेमकं कोणी पाठवलं आणि त्या मागच्या उद्देशाची चौकशी सूरू करण्यात आली आहे.

व्हायरल पत्रात नेमकं काय?

मुंबईतील मोटार परिवहन विभागात काम करणाऱ्या आठ महिला पोलीस शिपायांवर तीन वरिष्ठ पोलीस अधिकाऱ्यांकडून अत्याचार झाल्याचा आरोप या पत्रात करण्यात आला आहे. त्यामुळे मुंबई पोलीस दलात एकच खळबळ उडाली. मुंबई पोलीस दलाच्या नागपाडा मोटार परिवहन विभागातील पीडित महिला आणि आरोपी अधिकारी असल्याचं या पत्रात म्हटलं आहे.

मोटार परिवहन विभागात काम करणाऱ्या आठ महिला पोलीस शिपायांवर तीन वरिष्ठ पोलीस अधिकाऱ्यांकडून मागील अनेक दिवसांपासून वारंवार बलात्कार झाल्याचा दावा या पत्रात करण्यात आला आहे. त्याचबरोबर महिला पोलीस कर्मचारी गरोदर राहिल्यानंतर त्यांना जबरदस्तीनं गर्भपात करण्यास देखील भाग पाडण्यात आल्याचा दावा खळबळजनक आरोप महिला पोलीस कर्मचाऱ्यांनी केल्याचं या पत्रात म्हटलं आहे.

ते पत्र बनावट असल्याचा दावा करण्यात येत आहे. अशी कोणतीही घटना घडलेली नाही, जी घटना माध्यमांमध्ये आली आहे, ती चुकीची आहे, असं पोलिसांकडून सांगण्यात येत आहे.