ठाणे : कोरोनाच्या वाढत्या प्रादुर्भावाच्या पार्श्‍वभूमीवर पुकारण्यात आलेल्या लॉकडाऊनमुळे अनेक व्यवसाय, उद्योग धंदे ठप्प झाले. यात वाहन विक्रीचा वेगही कमालीचा मंदावला होता. महिनाभरात एकाही वाहनाची खरेदी न झाल्याचा विक्रमही याच लॉकडाऊन काळात झाला. मात्र, "मिशन बिगीन' अंतर्गत सर्व व्यवहार हळूहळू सुरळीत होत असताना वाहन विक्रीनेही वेग घेतला. त्यात दसऱ्याच्या मुहूर्तावर वाहन विक्रीने अधिक वेग घेत ठाणे जिल्ह्यात तब्बल एक हजार 84 वाहनांची विक्रीची नोंद केली. यामुळे जिल्ह्यातील ठाणे, कल्याण आणि नवी मुंबई या तीन उपप्रादेशिक परिवहन कार्यालयांना (आरटीओ) सुमारे सव्वादोन कोटींचा महसूल प्राप्त झाला आहे.
गुढीपाडवा, अक्षय तृतीय आणि दसरा या साडेतीन मुहूर्तांवर सोन्याचे दागिने व वाहनांची मोठ्या प्रमाणात खरेदी होत असते. यंदा कोरोना महामारीने मार्च महिन्यांपासून टाळेबंदी लागू करण्यात आली. परिणामी गुढीपाडवा आणि अक्षय तृतीया या दोन्ही शुभमुहूर्तांवर वाहनांची विक्री ठप्पच होती. त्यामुळे मोठा आर्थिक फटका विक्रेत्यांना सहन करावा लागला.
वाहन विक्री बंद असल्यामुळे प्रादेशिक परिवहन विभागाचाही महसूल बुडाला होता. सरकारने ठप्प पडलेल्या राज्यातील उद्योगधंद्यांना गती मिळावी यासाठी टाळेबंदीत शिथिलता आणल्याने हळूहळू सर्व उद्योग, व्यवसाय पूर्वपदावर येऊ लागले. त्यात गेल्या सात महिन्यांपासून ठप्प असलेली वाहन विक्री दसऱ्याच्या मुहूर्तावर पुन्हा तेजीत आल्याचे दिसून आले.
ठाणे जिल्ह्यातील ठाणे, कल्याण आणि नवी मुंबई या तीन उपप्रादेशिक परिवहन कार्यालयाअंतर्गत दसऱ्याच्या पूर्वसंध्येला व दसऱ्याच्या मुहूर्तावर एक हजार 84 वाहन विक्रीची नोंद झाली. यामध्ये सर्वाधिक 826 दुचाकी, 256 कार आणि दोन वाहतूक वाहनांचा समावेश आहे. या वाहनांच्या विक्रीतून उपप्रादेशिक परिवहन कार्यालयांना दोन कोटी 24 लाख 19 हजार रुपयांचा महसूल मिळाला आहे.
आरटीओ वाहन विक्री मिळालेला महसूल
ठाणे 733 1 एक कोटी 39 लाख 73 हजार 684
कल्याण 249 52 लाख 77 हजार 97
नवी मुंबई 102 31 लाख 68 हजार 726
एकूण 1, 084 2 कोटी 24 लाख 19 हजार 507
-------------------------
(संपादन : प्रणीत पवार)
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.