डहाणू : देशभर चर्चेत असलेल्या पालघर जिल्ह्यातील गडचिंचले येथे घडलेल्या तिहेरी हत्याकांडातील आरोपींना गुरुवारी (ता.20) डहाणूच्या दिवाणी आणि फौजदारी न्यायालयात हजर केले. या आरोपींना कायद्याचे संरक्षण मिळवून देण्यासाठी आदिवासी मुक्ती मोर्चा ही संघटना सरसावली आहे. संघटनेतर्फे ऍड. किरण भोईर यांनी गुरुवारी याप्रकरणी 40 आरोपींच्या बाजूने डहाणू दिवाणी व फौजदारी न्यायालयात वकीलपत्र सादर केले. यासाठी आदिवासी मुक्ती मोर्चाचे अध्यक्ष अनंता वनगा यांनी पुढाकार घेतला. दरम्यान, यापूर्वी 28 आरोपींना चार्जशीट दाखल न झाल्याने कोर्टाने जामीन मंजूर केला आहे.
लॉकडाऊनच्या काळात 16 एप्रिलला गडचिंचले येथे मोटार गाडीतून जाणाऱ्या दोन साधू आणि त्यांच्या वाहनचालकाची जमावाने निर्घृणपणे हत्या केली होती. या प्रकरणानंतर देशभर संतापाची लाट उसळली होती. याप्रकरणी दोन फिर्यादी दाखल करण्यात आल्या होत्या. त्यामध्ये सुमारे 165 आरोपींना अटक करण्यात आली असून सीआयडीमार्फत तपास केला आहे. अटकेत असलेल्या आरोपींचे वकीलपत्र घेण्यास सुरुवातीपासून काही वकिलांनी पाठ फिरवली होती. त्यामुळेच आदिवासी मुक्ती मोर्चाचे अध्यक्ष अनंता वनगा यांनी निरपराध आरोपींना कायद्याचे संरक्षण मिळावे म्हणून प्रयत्न केले. त्यानंतर वाडा तालुक्‍यातील वकील ऍड. किरण भोईर यांनी 40 जणांचे वकीलपत्र दाखल केले आहे.
आदिवासी मुक्ती मोर्चाचे अध्यक्ष अनंता वनगा यांच्या आग्रहाखातर याबाबत वकीलपत्र घेण्याचा निर्णय घेतला. भारतीय संविधानाने प्रत्येक नागरिकाला कायद्याचे संरक्षण दिले आहे. याप्रकरणी निरपराध आरोपींची बाजू सन्माननीय न्यायालयात मांडणे आव्हानात्मक आहे. कायद्याच्या चौकटीत न्याय मिळवून देण्यासाठी प्रयत्न असेल.
- किरण भोईर, वकील.
----------------------
(संपादन : गोरक्षनाथ ठाकरे)
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.