Akshay Shinde: एन्काऊंटर पूर्वी अक्षय शिंदे आपल्या आईशी शेवटचं काय बोलला?

बदलापूर येथील शाळेतील निष्पाप मुलींचे शोषण करणारा आरोपी अक्षय शिंदे पोलिसांच्या चकमकीत ठार झाला आहे. आरोपी अक्षय शिंदे याने पोलिसांच्या गाडीतून रिव्हॉल्व्हर हिसकावून पोलिस पथकावर गोळीबार केल्याचे समोर आले आहे. आरोपींनी पोलिस पथकावर अनेक राऊंड गोळीबार केला, ज्यात पोलिस अधिकारीही जखमी झाले. पोलिसांचे पथक तळोजा कारागृहातून अक्षयला घेऊन जात असताना हा प्रकार घडल्याचे पोलिसांनी सांगितले.

यावर अक्षय शिंदेंच्या कुटुंबियांनी प्रतिक्रिया दिली. अक्षय शिंदेची आई म्हणाली की, आम्ही जेव्हा अक्षय शिंदेला इथे घेऊन का येत नाही, असं विचारलं होतं तेव्हा पोलिसांनी आम्हाला सांगितलं होत की, त्याला इथे घेऊन आलो तर त्याला मारून टाकतील. त्याचा रिपोर्ट मोठा आहे. मी माझ्या मुलासोबत बोललीही होती. तेव्हा त्याने मला विचारलं होतं आई मला कधी सोडवणार. माझी चार्जशीट पण आली आहे. त्यावर मी म्हणाले थांब जरा बघू आपण, करू सुटका. एक कागद त्याच्या हातात होता. माझ्या पोराला मारून टाकलं आहे. माझ्या पोराची भरपाई करून द्या. नाहीतर आम्हाला पण गोळ्या घाला. माझ्या पोराने कधी फटाकडी नाही वाजवली तर गोळी कशी घालेल.

माझ्या पोराची मी वाट बघत होते. माझा पोरगा कधी येईल. माझा मुलगा असं करू शकत नाही. अत्याचार प्रकरणात माझ्या पोरावर खोटे आरोप लावले आहेत. दुसरं कुणी अत्याचार केले आणि माझ्या पोरावर नाव टाकले आहे. १२ तारखेला घटना झाली आणि माझा पोरगा १७ तारखेपर्यंत गेला आहे. त्याने असं काही केलं असतं तर कशाला गेला असता कामाला? माझा पोरगा भोळा आहे, तो असं करू शकत नाही. त्याला गोळ्या घालून मारून टाकलं आहे. आता आम्हाला पण गोळ्या घालून मारा. आम्ही पण आता मरणार आहोत, असं एका वृत्तवाहिनीवर अक्षय शिंदेची आईने सांगितलं आहे.