Ambarnath Crime: हेरंब गणपती मंदिरातील चोरी प्रकरणात पोलिसांनी आवळल्या त्रिकुटाच्या मुसक्या !

Latest Ulhasnagar News: आठ दिवसांपूर्वी अंबरनाथच्या परिसरातील प्रसिद्ध हेरंब गणपती मंदिरात मोठी चोरी घडली होती.त्यात चोरट्यांनी मंदिराच्या गाभाऱ्यातील गणपतीचे सुमारे तीन किलो वजनाचे चांदीचे दागिने आणि चार दानपेट्यांमधील रोख रकमेवर डल्ला मारला होता.मात्र या मुद्देमालाची विल्हेवाट लावण्यापूर्वीच उल्हासनगर गुन्हे अन्वेषणचे वरिष्ठ पोलीस निरीक्षक अशोक कोळी यांच्या टीमने त्रिकुटाच्या मुसक्या आवळल्या असून त्यांच्याकडून जवळपास पावणे दोन लाखाचा मुद्देमाल जप्त करण्यात आला आहे.

खेर सेक्शन परिसरात हेरंब गणपती मंदिर आहे.7 तारखेच्या पहाटे दोन चोरट्यांनी मंदिरात चोरी करण्यापूर्वी सीसीटीव्हीच्या वायर्स तोडण्याचा प्रयत्न केला.त्यांना वाटले की वायरी तुटल्यात म्हणून त्यांनी मंदिराच्या गाभाऱ्यातील गणपतीचे सुमारे तीन किलो वजनाचे चांदीचे दागिने आणि चार दानपेट्यांमधील रोख रकमेवर डल्ला मारून पळ काढला.पण काही वायरी सुरक्षित राहिल्यान हे चोर सीसीटीव्हीमध्ये कैद झाले.या घटनेचा समांतर तपास गुन्हे अन्वेषणचे वरिष्ठ पोलीस निरीक्षक अशोक कोळी करत होते.त्यांनी ठाणे गुन्हे विभागाचे पोलीस उपायुक्त शिवराज पाटील,सहाय्यक पोलीस आयुक्त शेखर बागडे यांच्या मार्गदर्शनाखाली सीसीटीव्हीच्या आधारे तपासला गती दिली.

14 तारखेला वरिष्ठ पोलीस निरीक्षक अशोक कोळी यांना माहिती मिळाली की,हेरंब गणपती मंदिरातील चोरी प्रकरणारील आरोपी अंबरनाथ पश्चिमेतील जुना भेंडीपाडा मटका चौकात आहेत.तेंव्हा क्राईम युनिट पथकाचे हेड कॉन्स्टेबल चंदू पाटील,चंदू सावंत,प्रसाद तोंडलीकर,संजय शिरमाले,योगेश वाघ,पिंटू थोरवे,सतीश सपकाळे,मधुकर माळी आणि बाळा पाटील यांनी सापळा रचून अरबाज मेहमूद खान,सतीश भाऊसाहेब भालेराव यांच्यावर झडप घातली.

त्यांना दमात घेताच आरोपींनी ज्याच्याकडे मुद्देमाल ठेवण्यात आला होता त्या रेहान शेख यालाही ताब्यात घेण्यात आले. आरोपी मुद्देमालाची विल्हेवाट लावण्याच्या बेतात होते.मात्र त्यांचा बेत फसला असून त्यांच्याकडून चांदीचे दागिने आणि रोख रक्कम असा जवळपास पावणे दोन लाखाचा मुद्देमाल हस्तगत करण्यात आल्याची माहिती वरिष्ठ पोलीस निरीक्षक अशोक कोळी यांनी दिली.