'भाजपला जनतेच्या विकासाशी काहीही देणघेण नाही'

मुंबई महापालिका निवडणूकीच्या पार्श्वभूमीवर सत्ताधारी आणि विरोधक यांच्यात जोरदार खंडाजंगी सुरु आहे. दरम्यान मुंबई महापालिकेत सत्ता असणाऱ्या शिवसेनेला भाजपा अनेक कारणांवरून धारेवर धरतं असतात. स्पोर्ट्स कॉम्प्लेक्सला राणी लक्ष्मीबाई यांच नाव देण्यात यावं अशी मागणी शिवसेनेनं केली. दरम्यान याच मुद्द्यावरून सत्ताधारी आणि विरोधत एकमेकांवर टीकास्त्र सोडत आहेत. आता मुंबईचे पालकमंत्री अस्लम शेख यांनीही भाजपाला टोला लगावला आहे.

दरम्यान मुंबईचे पालकमंत्री अस्लम शेख यांनी भाजपावर निशाणा साधला आहे. भाजप नगरसेवकांनीच २०११ मध्ये त्या मैदानासाठी टिपू सुलतान या नावाचा प्रस्ताव दिला असल्याचा खुलासा त्यांनी केला आहे. आता महापालिका निवडणुकीच्या पार्श्वभूमीवर विरोधक या संदर्भात लाचार झाले असुन वारंवार हा विषय काढत आहेत. यांना जनतेच्या विकासाशी काहीही देणघेण नाही, असा घणाघात त्यांनी केला आहे.

या मुद्द्यावर भाजपा प्रवक्ते राम कदम यांनीही प्रतिक्रिया दिली आहे. ते म्हणतात, त्या मैदानाला टीपू सुलतान नाही, तर छत्रपती शिवाजी महाराजांचे नाव द्यायला हवे. जर तुम्हाला जमणार नसेल तर आम्ही स्वतः शिवरायांच्या नावाचा बोर्ड तिथे जाऊन लावू. मुख्यमंत्र्यांनी अन् त्यांच्या सरकारने मंत्र्याना मैदानाच्या उद्घाटनापासून रोखावे, अन्यथा आम्हाला रस्त्यावर उतरावे लागेल, असा इशारा त्यांनी दिला आहे. हिंदुचा नरसंहार करून मंदिरांना उध्वस्त करणार्‍या आक्रमणकारी टीपू सुलतानचा सन्मान छत्रपती शिवाजी महाराजांच्या भूमीत खपवून घेणार नसल्याचंही त्यांनी स्पष्ट केलं आहे.