CM on Baba Siddique: सिद्दीकी हत्येचा खटला फास्टट्रॅक कोर्टात चालवणार; एन्काऊंटर स्पेशालिस्ट दया नायक करणार तपास; मुख्यमंत्र्यांची घोषणा

मुंबई : राष्ट्रवादी काँग्रेसचे नेते बाबा सिद्दीकी यांच्यावर मुंबईतील वांद्रे पूर्व इथं गोळीबार करण्यात आला, यात त्यांचा मृत्यू झाला आहे. सिद्दीकी यांच्या मृत्यू प्रकरणाचा खटला फास्टट्रॅक कोर्टात चालवणार असल्याची घोषणा मुख्यमंत्री एकनाथ शिंदे यांनी माध्यमांशी बोलताना केली आहे. तसेच एन्काऊंटर स्पेशालिस्ट दया नायक या प्रकरणाचा तपास करणार असल्याचीही माहिती मिळतेय.

मुख्यमंत्री म्हणाले, पोलिसांना निर्देश दिलेले आहेत की मुंबईत कुठल्याही परिस्थितीत कायदा-सुव्यवस्था कोणी हातात घेता कामा नये. गँगवार डोकं वर काढता कामा नये. अशा घटना घडवून आणणाऱ्यांवर कठोर कारवाई करण्याच्या सूचना दिल्या आहेत. मुंबई पोलीस यातील आरोपींना पकडतील आणि कारवाई करतील.

आरोपी हरयाणा आणि उत्तर प्रदेशचे

बाबा सिद्दीकी यांच्यावर ज्यांनी हल्ला केला त्यांच्यावर तात्काळ कठोर कारवाई करण्यात येईल. यातील दोन आरोपींना पकडण्यात आलं आहे, यातील एक हरयाणा आणि उत्तर प्रदेशचा आहे. तिसऱ्या आरोपीलाही लवकरच पकडण्यात येईल.

केस फास्टट्रॅक कोर्टात चालवणार

ही केस आपण फॅस्टट्रॅकवर चालवण्याची कोर्टाला विनंती करुन अशा प्रकारच्या गुन्हेगारांना जरब बसेल अशा प्रकारची कारवाई करण्याचे निर्देश पोलिसांना देण्यात आले आहेत, अशी माहिती यावेळी मुख्यमंत्री एकनाथ शिंदे यांनी दिली.