Badlapur: बर्थ डे पार्टीत तरुणीला मैत्रिणीनं पाजलं गुंगीचं औषध अन् नराधम मित्रांनी... बदलापुरात अत्याचाराची आणखी एक भयंकर घटना

गेल्या काही दिवसांपासून अत्याचारांच्या घटनांसाठी चर्चेत असलेल्या बदलापुरातून आणखी एक घटना समोर आली आहे. येथे वाढदिवसाच्या पार्टीत एका तरुणीवर दोन मित्रांनी अत्याचार केले असून यासाठी पीडिती तरुणीच्या मैत्रिणीनेच मदत केल्याचे समोर आले आहे.

मिळालेल्या माहितीनुसार पीडित तरुणीला वाढदिवसाच्या पार्टीला घेऊन जात तिच्या मैत्रिणिने औषध पाजले आणि नंतर दोन मित्रांनी अत्याचार केला.

ही घटना बदलापूरच्या शिरगाव परिसरातील एका अपार्टमेंटमध्ये बुधवारी आणि गुरुवारी मध्यरात्री घडली, असे एका अधिकाऱ्याने सांगितले.

तक्रारीच्या आधारे पोलिसांनी आरोपी संतोष शिवराम रुपावते (४०), शिवम संजय राजे (२३), अलिस्का उर्फ ​​भूमिका रवींद्र मेश्राम (२०) यांना अटक केली आहे, असे त्यांनी सांगितले.

भूमिकाने पीडितेला तिच्या मित्राच्या घरी वाढदिवसाच्या पार्टीला बोलावले होते. त्यानंतर पीडिता भूमिकासोबत शिरगाव येथील फ्लॅटवर पार्टीसाठी गेली. फ्लॅटमध्ये भूमिकाचा सातारा येथील नातेवाईक संतोषही त्यांच्यासोबत आला होता. त्यांनी कथितरित्या पीडितेच्या पेयात गुंगीचे औषध घातले. त्यानंतर दोन पुरुष आरोपींपैकी एकाने तिच्यावर बलात्कार केला, असे एका पोलीस अधिकाऱ्याने सांगितले.

दरम्यान, पीडितेच्या तक्रारीच्या आधारे पोलिसांनी तीन संशयितांना तत्काळ अटक केली. त्यांच्यावर भारतीय न्याय संहितेच्या विविध कलामांनुसार गुन्हे दाखल केले आहेत. शिवाय, या गुन्ह्याबाबत पोलीस अधिक माहिती गोळा करत असल्याने या प्रकरणाचा तपास सुरू आहे.