Badlapur News: बदलापूर खरवई MIDC कंपनीत भीषण स्फोट; काही जण जखमी; घटनेचा VIDEO आला समोर

बदलापूर शहरातील खरवई एमआयडीसी परिसरातील एका कंपनीमध्ये गुरुवारी पहाटेच्या सुमारास भीषण स्फोट झाला. या स्फोटामध्ये ४ ते ५ कामगार जखमी झाल्याची प्राथामिक माहिती समोर आली आहे. स्फोटामुळे कंपनीला मोठी आग लागली असून घटनास्थळी अग्निशमन दलाचे बंब दाखल झाले.

मिळालेल्या माहितीनुसार, बदलापूर खरवई एमआयडीसीमध्ये गुरुवारी पहाटे ही घटना घडली. या एमआयडीसीतील व्ही.के केमिकल या कंपनीला पहाटे चार वाजून 45 मिनिटांच्या सुमारास भीषण आग लागली. या आगीमुळे कंपनीत चार ते पाच स्फोट झाले. या स्फोटाचे हादरे 4 ते 5 किलोमीटर पर्यंत जाणवले आहेत. या घटनेत चार ते पाच कामगार गंभीर जखमी झाल्याची माहिती आहे.

कंपनीतील कर्मचाऱ्यांनी दिलेल्या माहितीनुसार, कंपनी बाहेर दोन टेम्पो उभे होते. या टेम्पोमधील केमिकल मध्ये प्रथम आग लागली. त्यानंतर ही आग कंपनीमध्ये पसरली. या आगीबाबत माहिती मिळताच बदलापूर, अंबरनाथ आनंद नगर एम आय डी सी मधील अग्निशमन दल घटनास्थळी दाखल झालं असून आता आगीवर नियंत्रण मिळवण्यात यश आलं आहे.