हायटेक चोरी : फास्टॅगद्वारे बँकेला २० कोटींचा गंडा

मुंबई : फास्टॅगच्या माध्यमातून ऑनलाईन टोल भरणाऱ्यांची संख्या वाढत आहे. आता भामट्यांनी बॅंकेची ऑनलाईन यंत्रणेतील त्रुटींचा फायदा घेत 20 कोटी रुपयांच्या फास्टॅग खरेदीद्वारे ऑनलाईन फसवणूक केल्याचा प्रकार उघडकीस आला आहे. या प्रकरणी सायबर पोलिसांनी चेन्नईतून चौघांना अटक केली असली, तरी मुख्य आरोपी अद्याप हाती लागलेला नाही. 

महत्त्वाची बातमी : ठाणेकरांसाठी खुशखबर... अखेर "क्‍लस्टर'चे ठरले!

या प्रकरणी बॅंकेच्या तक्रारीवरून सायबर पोलिस ठाण्यात गुन्हा दाखल करण्यात आला होता. एका अनोळखी व्यक्तीने 18 ते 24 जानेवारी 2020 या काळात बॅंकेची लेजर यंत्रणेतील त्रुटींचा फायदा घेत 4259 अनधिकृत व्यवहार केल्याचे लक्षात आले. त्या व्यवहारांद्वारे 19 कोटी 84 लाख रुपयांचे फास्टॅग खरेदी केल्याचे निष्पन्न झाले. काही प्रकरणांत आरोपींनी वाहनांचे चुकीचे "केवायसी' भरले असून परताव्याची मागणी केली. ही रक्कम आरोपींनी अन्य 500 खात्यात जमा केली. 

हेही वाचा ः शिवसेनेच्या वाघाने फाडले आशिष शेलारांचे कपडे, मुंबईत बॅनरबाजी..

या प्रकरणी पुरुषोत्तम रावण्णा (40), किरण मंजू (35), राजेश शिवण्णा (34) व रसण्णा ऊर्फ प्रकाश शिवण्णा (37) यांना सायबर पोलिसांनी चेन्नईतून अटक केली. हे सर्व आरोपी मूळचे कर्नाटकातील बंगळुरू परिसरातील आहेत. मुख्य आरोपीने प्रलोभन दाखवून या चौघांच्या बॅंक खात्यांचा वापर केल्याचे प्राथमिक तपासात समोर आले आहे. पोलिस आणखी दोघांचा शोध घेत असून, त्यात मुख्य आरोपीचा समावेश आहे. 

कोट्यवधी रुपयांची फसणूक झाल्याचे लक्षात आल्यावर बॅंकेने सायबर पोलिसांकडे तक्रार केली. त्यानुसार पोलिसांनी बॅंक यंत्रणेतून गेलेल्या रकमेच्या माध्यमातून खातेदारांची माहिती मिळवली. त्या वेळी या आरोपींची माहिती सायबर पोलिसांना मिळाली. त्यानंतर पोलिसांनी तीन पथके पाठवून चार आरोपींना अटक केली. मुख्य आरोपी हाती लागल्यानंतरच अधिक माहिती मिळू शकेल, असे एका पोलिस अधिकाऱ्याने सांगितले. यापैकी पोलिसांना संबंधित खात्यातून 7 कोटींची रक्कम जप्त करण्यात यश आले. 

त्रुटींचा गैरफायदा 
तक्रारदार बॅंकेने नुकतीच ई-वॉलेटच्या माध्यमातून फास्टॅग खरेदीची सुविधा सुरू केली होती. त्यात मोबाईल ऍप्लिकेशनद्वारे फास्टॅग खरेदीचाही समावेश होता. त्यातील काही त्रुटींचा गैरफायदा घेऊन आरोपीने ही फसवणूक केल्याचे प्राथमिक तपासात निष्पन्न झाले आहे. त्यासाठी त्याने वर्षभर बॅंकेच्या लेजर यंत्रणेतही शिरकाव केला होता. या माध्यमातून मोठ्या प्रमाणात तोटा झाल्यानंतर बॅंकेने अंतर्गत तपासणी केली.