Loksabha News: भाजपचे नेते अमित शाह यांची वसईत प्रचार सभा, कोणावर साधणार निशाणा?

Palghar loksabha: भाजपचे ज्येष्ठ नेते केंद्रीय गृहमंत्री तथा सहकारमंत्री अमित शाह यांची सोमवार दि. १३ मे रोजी सकाळी ११.३० वाजता वसई पश्चिमेला सनसिटी येथील भव्य पटांगणात जाहीर प्रचार सभा होणार आहे.

महायुतीचे पालघर लोकसभेचे उमेदवार डॉ. हेमंत सवरा यांच्या प्रचारासाठी अमित शहा वसईत येणार आहेत. यामुळे वसई विरारसह पालघर जिल्हा भाजपच्या कार्यकर्त्यांमध्ये उत्साहाचे वातावरण पसरले आहे. वसईत अमित शाह काय बोलणार याकडे राजकीय निरीक्षकांचे लक्ष लागून राहिले आहे.

देशाचे पंतप्रधान नरेंद्र मोदी यांनी अमित शाह यांना केंद्रीय गृहखात्याची जबाबदारी सोपवल्यामुळे अमित शाह यांनी प्रथम देशाच्या सुरक्षेला प्राधान्य दिले. तसेच बहुजन विकास आघाडी पालघरचा स्थानिक पक्ष असून त्यांनी देखील आपला उमेदवार उतरवला असल्याने गेल्या काही दिवसांपासून बहुजन विकास आघाडी आणि भाजप यांच्या मध्ये सुरू असलेली शाब्दिक लढाई बाबत अमित शहा काय म्हणतात हा मोठा प्रश्न आहे.

तसेच पालघर मध्ये सर्वात मोठा मुद्दा हा वाढवण बंदराचा असल्याने इतर पक्ष त्याला विरोध करत आहेत तर भाजप या बाबत काय भूमिका घेतात तसेच या वर अमित शहा आपले मत मांडणार का ? हे देखील पाहण्यासारखा असेल.