'बिनधास्त लोकलने प्रवास करा'; भाजपचे आंदोलन तीव्र

मुंबई- कांदिवलीत अतुल भातखळकर यांच्या नेतृत्त्वात भाजपने आंदोलन सुरु केले आहे. लोकल प्रवास सर्वसामान्यांसाठी सुरु करण्यात यावा यासाठी भाजपचे आंदोलन होत आहे. दोन लस घेतल्यांना आणि पत्रकारांना लोकल प्रवासास मंजुरी द्यावी अशी मागणी भाजपची आहे. भाजप नेते लोकलने प्रवास करणार आहेत. तसेच दोन डोस घेतलेल्यांनीही प्रवास करावा असं आवाहन त्यांनी केलं आहे. लोकल प्रवासावरुन भाजप आक्रमक झाल्याचं पाहायला मिळत आहे. कोरोना महामारीच्या पार्श्वभूमीवर सर्वसामान्यांसाठी लोकल बंद करण्यात आली आहे. त्यामुळे मुंबईकरांना मोठ्या समस्येला सामोरं जावं लागत आहे. सरकारने लोकल प्रवासाला परवानगी द्यावी अशी मागणी जोर धरु लागली आहे.

भाजप मुंबईतील विविध ठिकाणी आंदोलन करत आहे. यावेळी रेल्वे स्टेशनजवळ भाजप कार्यकर्त्यांनी मोठी गर्दी केल्याचं पाहायला मिळत आहे. कांदिवली, चर्चेगेट, दहिसर याठिकाणी आंदोलन तीव्र झाले आहे. भाजप नेते रेल्वे प्रवास करुन सविनय कायदेभंग करत आहेत. यावेळी पोलिसांचा चोख बंदोबस्त आहे. आमदार अतुल भातखळकर यांच्या नेतृत्त्वात हे आंदोलन होत आहे. पोलिसांकडून कार्यकर्त्यांना रोखण्याचा प्रयत्न होत आहे.

प्रविण दरेकर आणि मंगलप्रभात लोढा हेही आंदोलनात सहभागी झाले आहेत. माध्यमांशी संवाद साधताना प्रविण दरेकर म्हणाले की, 'सर्वसामान्यांना लोकल प्रवासाची सेवा मिळायला हवी. भाजप यासाठी तीव्र आंदोलन करेल. आम्ही रेल्वने प्रवास करणार असून सविनय कायदेभंग करण्यात येईल.' यावेळी अतुल भातखळकर म्हणाले की, आम्ही २ ऑगस्टपर्यंत वाट पाहिली. त्यांना पत्र लिहिली. पण, सरकारने काहीही पाऊलं उचललं नाही. त्यामुळे आमचे लोकांना आवाहन आहे की दोन डोस घेतलेल्यांनी बिनधास्त लोकलने प्रवास करावा. रोखण्याचा प्रयत्न केला तरीही आम्ही प्रवास करणार आहोत.