'मुख्यमंत्री पदाची माळ घालून उद्धव ठाकरेंनी मतदारांशी गद्दारी केली'; आमदार भातखळकरांची सडकून टीका

विरार : शिवसेना पक्षप्रमुख उद्धव ठाकरे (Uddhav Thackeray) यांच्यावर भाजप नेते आमदार अतुल भातखळकर (Atul Bhatkhalkar) यांनी आसूड ओढले. ते म्हणाले, मागील अनेक दशके भाजपसोबत (BJP) असलेल्या शिवसेनेने २०१९ च्या सार्वत्रिक विधानसभा निवडणुकानंतर भाजपचा घात केला. उद्धव ठाकरे यांनी मुख्यमंत्रीपदाच्या लालसेपोटी महाविकास आघाडीशी समझोता केला. एवढेच नव्हे तर मुख्यमंत्री पदाची माळ घालून त्यांनी मतदारांशी गद्दारी केली, असा टोला त्यांनी उद्धव ठाकरेंना लगावला.

भारतीय जनता पक्षाच्या पालघर जिल्हा आणि वसई विरार जिल्ह्याच्या वतीने काल (रविवार) ढेकाळेमधील द फर्न हॉटेल येथे पालघर (Palghar) लोकसभा क्षेत्र आढावा बैठकीचे आयोजन करण्यात आले होते. यावेळी भाजप नेते बाबाजी काठोळे, राजन नाईक, मा. आ. विलास तरे, जिल्हाध्यक्ष महेंद्र पाटील, शेखर धुरी, मनोज पाटील, मनोज बारोट आदी उपस्थित होते.

यावेळी आमदार अतुल भातखळकर यांनी उपस्थित पत्रकारांची संवाद साधला आणि पत्रकारांच्या प्रश्नांना उत्तरे दिली. पालघर जिल्ह्यातील मतदारांनी नवनिर्वाचित खासदार डॉ. हेमंत सावरा यांना भरघोस मतदान करून भाजपला चांगला विजय मिळवून दिल्याबद्दल त्यांनी मतदारांचे आभार मानले. ते पुढे म्हणाले, देशभरातील जनतेने भाजपला मोठ्या प्रमाणात मतदान करून नरेंद्र मोदींना पंतप्रधान केले. भारताच्या इतिहासात माजी पंतप्रधान पंडित नेहरू यांच्यानंतर नरेंद्र मोदी तिसऱ्यांदा पंतप्रधान झाले. विकासाच्या दिशेने पुन्हा एकदा कामाला लागलो आहोत. आगामी विधानसभा निवडणुकांच्या पूर्वतयारीचा विचार सुरू आहे.