'सर्व चाव्या फडणवीसांकडे तर मग पाठीत खंजीर का खुपसला?'

मुंबई: "मराठा आरक्षण, (maratha reservation) ओबीसींचे (obc) राजकीय आरक्षण, धनगर आरक्षण, नवी मुंबई आंतरराष्ट्रीय विमानतळाचा विषय असे सगळे कठीण प्रश्न सोडविण्याची चावी फक्त फडणवीस (devendra fadnavis) यांच्याकडे आहे. ते चतुर आणि चणाक्ष नेते आहेत, असा उल्लेख आजच्या सामनाच्या अग्रलेखात करण्यात आला आहे. उशीरा का होईना पण फडणवीस यांच्यातील नेतृत्वगुणांबाबत आपल्याला उपरती झाली, हेही नसे थोडके" अशा शब्दात भाजपाच्या प्रदेश उपाध्यक्ष चित्रा वाघ (chitra wagh) यांनी शिवसेनेला चिमटा काढला आहे. (Bjp state vice president chitra wagh slam shivsena)

"सर्व प्रश्न सोडवण्याची चावी फडणवीस यांच्याकडे आहे, याचे भान शिवसेनेला २०१९ मध्ये झाले असते तर फडणवीस पुन्हा युतीचे मुख्यमंत्री झाले असते आणि आज महाराष्ट्राच्या इज्जतीची जी लक्तरे वेशीवर टांगली जात आहेत, ती टांगली गेली नसती. मात्र त्यावेळी फडणवीस यांना मुख्यमंत्री करुन युतीचे सरकार पुन्हा आणण्याऐवजी आपण पाठीत खंजीर खुपसला" अशी टीका चित्रा वाघ यांनी केली आहे.

"एका कतृर्त्ववान नेत्याला मुख्यमंत्रीपदापासून दूर ठेवल्याचा आनंद आपल्याला मिळाला असेलच. पण काँग्रेस आणि राष्ट्रवादी काँग्रेसला कायम दूर ठेवणाऱ्या शिवसेनाप्रमुख बाळासाहेब ठाकरेंना काय वाटेल? याचा क्षणभर विचार केला असता, तर आपण महाआघाडीचा प्रयोग केला नसता" अशी टीका चित्रा वाघ यांनी केली आहे.