कोरोनानंतर मुंबई महापालिका रुग्णालये होणार आणखी सुसज्ज

मुंबई : कोविड महामारीचा (corona pandemic) सामना करण्यासाठी महापालिकेने (bmc) जंबो कोविड केंद्रे (jumbo covid center) स्थापन केली. या केंद्रांमध्ये बेड, व्हेंटिलेटर, क्ष-किरण मशिन यांसारखी अनेक अत्यावश्यक वैद्यकीय उपकरणेही (medical equipment) खरेदी करण्यात आली, त्यामुळे लाखो लोकांचे प्राणही (saved people life) वाचले. आता याच वैद्यकीय उपकरणांचा वापर करून लवकरच महापालिकेच्या उपनगरीय रुग्णालयांमध्ये आणि 4 प्रमुख रुग्णालये आणि वैद्यकीय महाविद्यालयांतील रुग्णांवर उपचार (patients treatment) केले जाणार आहेत.

गेल्या वर्षी जेव्हा कोरोना महामारीने जोर पकडला तेव्हा रुग्णालयांमध्ये खाटांची कमतरता होती. अशातच महापालिकेने वरळी, बीकेसी, गोरेगाव, मुलुंड, दहिसर येथे युद्धपातळीवर जंबो कोविड केअर सेंटर उभारले. या कोविड केंद्रांमध्ये हजारो रुग्णांवर उपचार करण्यात आले आणि या जीवघेण्या आजारापासून ते बचावले. तिसऱ्या लाटेचा सामना करण्यासाठी काही केंद्रेही बांधण्यात आली होती. सध्या मुंबईत एकूण 11 जंबो कोविड केंद्रे रुग्णांसाठी सज्ज आहेत, मात्र कोविड आता नियंत्रणात आला आहे. मुंबईत दररोज 500 पेक्षा कमी रुग्ण येतात, त्यापैकी केवळ 25 टक्के रुग्णांना रुग्णालयात दाखल करण्याची आवश्यकता असते.

अशा स्थितीत डिसेंबरनंतर काही केंद्रे बंद करण्याचा विचार महापालिका करत आहे. केंद्रे बंद राहिल्यास त्या केंद्रातील खाटा, व्हेंटिलेटर आणि इतर वैद्यकीय उपकरणे पालिकेच्या उपनगरीय रुग्णालयांना आणि प्रमुख रुग्णालयांना दिली जातील, जेणेकरून कोविड नसलेल्या रुग्णांवर उपचार करता येतील. 2022 पर्यंत महापालिकेची 2 ते 3 रुग्णालये तयार होतील, अशा परिस्थितीत आम्ही जंबो कोविड केंद्रातील वैद्यकीय उपकरणे आणि बेड्स तेथे हलवू, असे अतिरिक्त महापालिका आयुक्त सुरेश काकाणी यांनी सांगितले.

10 हजार खाटा, 400 व्हेंटिलेटर

महापालिकेच्या एका वरिष्ठ अधिकाऱ्याने सांगितले की, मुंबईतील एकूण 11 जंबो कोविड केंद्रांमध्ये सुमारे 10000 खाटा उपलब्ध आहेत, याशिवाय 400 व्हेंटिलेटर, 40 डायलिसिस मशीन आणि 50 एक्स-रे मशीन उपलब्ध आहेत. ही संख्या खूप मोठी आहे आणि कोविडनंतर त्याचा वापर नॉन-कोविड रूग्णांच्या उपचारांसाठी होईल. याशिवाय उपनगरीय रुग्णालयांमध्ये ऑक्सिजन प्लांट उभारण्याचा विचार आहे.

मोठ्या रुग्णालयांचा भार होणार कमी

"आम्ही आतापर्यंत 15000 हून अधिक रुग्णांवर उपचार केले आहेत. सध्या केंद्रात 30 रुग्ण आहेत. कोविड नियंत्रणात राहिल्यास काही केंद्रे बंद करण्याचा प्रशासन विचार करत आहे. जंबोमध्ये पडून असलेली उपकरणे उपनगरीय रुग्णालयांना दिल्यास रुग्णांच्या उपचारासाठी उपयुक्त ठरेल आणि त्यांना सायन, केईएम, नायर आणि कूपर यांसारख्या मोठ्या रुग्णालयांमध्ये जाण्याची गरज भासणार नाही आणि त्यातून रुग्णांचा ओढा वाढणार नाही. काही प्रमाणात रुग्णालयांवरील भारही कमी होतील."

डॉ. प्रदीप आंग्रे , प्रमुख, मुलुंड जंबो कोविड सेंटर

डिसेंबरनंतर निर्णय घेणार

"मुंबईत कोविडचे फारच कमी रुग्ण आढळून येत आहेत, त्यापैकी 25 टक्के रुग्णांना रुग्णालयाची गरज आहे. सध्या आमची जंबो कोविड केंद्रे रिक्त आहेत. डिसेंबरपर्यंत कोविडची प्रकरणे वाढली नाहीत, तर काही केंद्रे बंद होतील आणि तेथे उपलब्ध असलेली वैद्यकीय उपकरणे रुग्णालयांमध्ये हलवली जातील."

सुरेश काकाणी, आयुक्त, अतिरिक्त महापालिका

उपकरणांसह तज्ञांची देखील आवश्यकता

महापालिकेच्या एका वरिष्ठ आरोग्य अधिकाऱ्याने सांगितले की, हा अतिशय चांगला निर्णय आहे, मात्र उपकरणांबरोबरच तज्ज्ञ आणि मनुष्यबळही लागणार आहे. त्याकडेही पालिकेला लक्ष द्यावे लागणार आहे.