गाईच्या मृत्यू प्रमाणपत्रासाठी लाच

मुंबई : गाईच्या मृत्यू प्रमाणपत्रासाठी 300 रुपयांची लाच घेतल्याच्या आरोपाबाबत सोलापूरमधील पशुविकास अधिकाऱ्याला तब्बल 29 वर्षांनी दिलासा मिळाला. पुरेशा सबळ पुराव्याअभावी मुंबई उच्च न्यायालयाने त्याची निर्दोष सुटका केली आहे.

अभियोग पक्षाच्या दाव्यानुसार, नोव्हेंबर 1991 मध्ये नागनाथ कदम यांनी एक जर्सी गाय खरेदी केली होती. या गाईचा विमाही काढण्यात आला होता. ही गाय आजारी पडल्यावर पशुविकास अधिकारी मधुकर सोनावणे यांनी उपचार करून 300 रुपये शुल्क मागितले. त्यानंतर दोनच दिवसांनी या गाईचा मृत्यू झाला. त्यामुळे विमा रक्कम मिळवण्यासाठी कदम यांनी मृत्यू प्रमाणपत्राची मागणी केली. त्यासाठी सोनावणे यांनी 500 रुपये लाच मागितली; मात्र 300 रुपयांत तडजोड झाली, असा आरोप होता.

या प्रकरणी कदम यांनी लाचलुचपत प्रतिबंधक विभागाकडे तक्रार केली. त्यावरून सोनावणे यांना पकडण्यात आले. त्यांनी 100 रुपये स्वतःसाठी व 200 रुपये अन्य एक डॉक्‍टरसाठी घेतल्याचा दावा तपास अधिकाऱ्यांनी केला. तथापि, विशेष न्यायालयाने दोन्ही अधिकाऱ्यांना दोषमुक्त केले. त्याविरोधात राज्य सरकारने उच्च न्यायालयात केलेल्या अपिलावर न्या. के. आर. श्रीराम यांच्यापुढे सुनावणी झाली.

साक्षीदारांचा जबाब आणि पुराव्यांमधील तफावतीमुळे न्यायालयाने कनिष्ठ न्यायालयाचा निर्णय कायम ठेवला. अन्य आरोपीचे सुनावणीदरम्यान निधन झाले आहे.