Police Constable : गुन्ह्याच्या प्रकरणात नाव लावू नये, म्हणून सात लाखांची मागणी; लाच स्वीकारणाऱ्या पोलीस हवालदारावर गुन्हा

डोंबिवली : एका गुन्ह्याच्या प्रकरणात आरोपी म्हणून नाव समाविष्ट करू नये, यासाठी तक्रारदाराकडे सात लाख रूपयांची लाच मागणाऱ्या, तसेच तडजोडीनंतर पाच लाख रूपये स्वीकारण्यास तयार झालेल्या कल्याण येथील महात्मा फुले चौक पोलिस ठाण्यातील (Mahatma Phule Chowk Police Station) हवालदार सुचित निवृत्ती टिकेकर (वय 40) यांच्यावर ठाणे लाचलुचपत प्रतिबंधक विभागाने कारवाई करत गुन्हा दाखल केला आहे.

पोलिसांकडून मिळालेल्या माहितीनुसार, लाचलुचपत प्रतिबंधक विभागाकडे तक्रार करण्यात आली होती. तक्रारदाराच्या मित्राच्या मेहुण्या विरूध्द महात्मा फुले चौक पोलिस ठाण्यात गुन्हा दाखल करण्यात आला आहे. या गुन्ह्याच्या प्रकरणात मेहुण्याला आरोपी करण्यात येऊ नये, यासाठी तक्रारदार आणि त्याच्या सहकाऱ्यांनी हवालदार (Police Constable) सुचित टिकेकर यांच्याकडे आग्रह केला होता.

दाखल असलेल्या गुन्ह्याच्या प्रकरणात मेहुण्याला आरोपी करायचे नसेल तर ही प्रक्रिया पार पाडण्यासाठी सात लाख रूपये लागतील, अशी मागणी टिकेकर यांनी तक्रारदाराकडे केली. गेल्या महिन्यापासून हा प्रकार सुरू होता. तक्रारदाराने सात लाखांमध्ये काही तडजोड करण्याची विनंती केली, त्यावर टिकेकर हे पाच लाख रुपये स्वीकारण्यास तयार झाले.

हवालदार टिकेकर पैशांसाठी तगादा लावत असल्यामुळे अखेर तक्रारदाराने लाचलुचपत प्रतिबंधक ठाणे विभागाचे अधीक्षक सुनील लोखंडे यांना याविषयी कळविले. वरिष्ठांनी दिलेल्या आदेशानंतर, लाचलुचपत प्रतिबंधक विभागाच्या पथकाने टिकेकर आणि तक्रारदार यांच्यात फोनवर होणाऱ्या संभाषणावर नजर ठेवली होती. यात हवालदार टिकेकर फसले.

तक्रारदाराकडे लाच मागत असल्याची खात्री पटल्यानंतर पोलिसांनी टिकेकर याच्या विरोधात या संदर्भातील तांत्रिक पुरावे जमा केले. त्या आधारे सरकारतर्फे लाचलुचपत प्रतिबंधक विभागाचे पोलिस निरीक्षक विजय कावळे यांनी दिलेल्या फिर्यादीवरून महात्मा फुले चौक पोलिस ठाण्यात बुधवारी हवालदार सुचित टिकेकर यांच्या विरोधात भ्रष्टाचार प्रतिबंधक अधिनियम 1988 (संशोधन 2018) चे कलम 7 अन्वये गुन्हा दाखल केला. या प्रकरणी लाचविरोधी पोलिस अधिक तपास करत आहे.