"तेलबिया, तेल, कडधान्यांना वायदे बाजार प्रतिबंध स्वागतार्ह"

मुंबई : अनेक प्रकारच्या तेलबिया (Oilseeds) ,कडधान्ये (Cereals) व काही खाद्यतेलांच्या (Edible oil) वायदे बाजारातील व्यवहारांना (forward Market dealing) प्रतिबंध करण्याच्या केंद्र सरकारच्या निर्णयाचे (central government decision) महाराष्ट्र चेंबर ऑफ कॉमर्स इंडस्ट्रीज अँड अॅग्रीकल्चर (Maharashtra chamber of commerce industries and agriculture) ने स्वागत केले असून यामुळे तेलांची कृत्रिम भाववाढ रोखली जाईल असे मत व्यक्त केले आहे.

केंद्र सरकारने नुकतेच या वस्तूंच्या वायदे बाजारातील व्यवहाराला प्रतिबंध करण्याचा निर्णय घेतला आहे. त्यावर चेंबरचे अध्यक्ष ललित गांधी यांनी वरील प्रतिक्रिया व्यक्त केली आहे. वायदेबाजारातील कृत्रिम व्यवहारांमधून ठराविक लोकच कोट्यवधी रुपयांचा नफा कमवतात व दुसरीकडे काही लोकांना मोठा फटका बसतो, असेही त्यांनी म्हटले आहे.

वायदे बाजारातील व्यवहारांमुळे जीवनावश्यक वस्तू, खाद्यपदार्थ, तेलबिया आदी वस्तूंच्या दरावर देशातील मोठे भांडवलदार त्यांच्या सोयीनुसार नियंत्रण ठेवतात. त्यामुळे कडधान्य, तेल, तेलबियांच्या किमती अनियंत्रित होऊन अनेक वेळा कृत्रिम भाववाढ झालेली बघायला मिळाली आहे. आता ही बाब टळेल तसेच शेतकऱ्यांच्या पिकाला चांगला भाव मिळेल, असेही गांधी यांनी म्हटले आहे.

ज्यावेळी नवीन पिक बाजारात यायची वेळ होते त्यावेळी सट्टेबाज या पिकाचे दर पाडतात. त्यामुळे शेतकऱ्यांचे नुकसान होते व नंतर तेलबिया, तेल व कडधान्यातील कृत्रिम भाववाढीमुळे व्यापाऱ्यांनाही मोठा फटका बसतो. आता व्यापाऱ्यांना स्थैर्य मिळण्याबरोबरच तेलाच्या किंमती कमी झाल्यामुळे ग्राहकांनाही फायदा होणार आहे. वायदे बाजारात प्रत्यक्ष वस्तूंची देवाणघेवाण न होता निव्वळ तेजी-मंदी खेळली जाते. त्यामुळे केंद्राने खरे तर सर्व प्रकारच्या वायदे बाजाराला पूर्णपणे प्रतिबंध घालण्याची गरज आहे अशी मागणीही त्यांनी केली.