मुंबई: गेल्या वर्षभरापासून राज्याला कोरोनाने ग्रासले आहे. कोरोनाचा प्रसार रोखण्यासाठी मुंबईची लाइफलाइन असलेली लोकल सेवा काही काळ सर्वसामान्यांसाठी बंद ठेवण्यात आली होती. मात्र आता हळूहळू सामान्य जनतेसाठी ही लोकलसेवा ठराविक वेळेपुरती सुरू करण्यात आली आहे. याचदरम्यान, मध्य रेल्वेने फुकट्या प्रवाशांवर कारवाईचा बडगा उगारल्याचं स्पष्ट झाले आहे. मध्य रेल्वे मार्गावरून विना तिकीट आणि अनियमित प्रवास करणाऱ्या सुमारे 3 लाख प्रवाशांना पकडण्यात आलं असून त्यांच्याकडून मध्य रेल्वेने 10 कोटी 4 लाखांचा दंड वसूल केला आहे.
मध्य रेल्वेच्या मुंबई विभागाने 15 जून 2020 ते 21 मार्च 2021 पर्यंत उपनगरी आणि लांब पल्ल्याच्या रेल्वे गाड्यांमध्ये सखोल व नियमित तिकीट तपासणी मोहीम चालविली. या तपासणी दरम्यान, विनातिकीट आणि अनियमित प्रवाशांची 3 लाख 2 हजार प्रकरणे आढळून आली. त्यांच्याकडून 10 कोटींचा दंड वसूल करण्यात आला. यापैकी सुमारे 2 लाख 25 हजार प्रकरणे ही उपनगरीय लोकलमधून आढळली. ज्यातून दंड म्हणून सुमारे 6 कोटींची वसूली करण्यात आली. तर लांब पल्ल्यांच्या रेल्वे गाड्यांमधून ७५ हजार प्रकरणांद्वारे ४ कोटींचा दंड वसूल करण्यात आला.
मध्य रेल्वे मार्गावरून अधिकृत तिकीट काढून प्रवास करणाऱ्या प्रवाशांना उत्तम सेवा देण्यासाठी मध्य रेल्वेच्या वतीने विनातिकिट आणि अनियमित तिकिट घेऊन प्रवास करणाऱ्यावर कारवाई करण्यात येत आहे. यासाठी विविध मोहिमा राबविल्या जात आहेत. अधिकृत तिकिट काढणाऱ्या प्रवाशांचा प्रवास सुरक्षित आणि आरामदायक होण्यासाठी तिकिट तपासणी केली जात असल्याची माहिती मध्य रेल्वे प्रशासनाने दिली आहे.
| महिना | विना तिकीट प्रवासी संख्या | दंड वसूली |
| जानेवारी 2021 | 65 हजार 140 | 1 कोटी 90 लाख रुपये |
| फेब्रुवारी 2021 | 79 हजार 251 | 2 कोटी 66 लाख रुपये |
| मार्च 2021 | 62 हजार 873 | 2 कोटी 42 लाख रुपये |
(संपादन - विराज भागवत)
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.