रायगड : उन्हाळा आला की महिलांना वेध लागतात ते वर्षभरासाठी मसाला बनवून ठेवण्याचे. लाल मिरचीसाठी कर्जतची बाजारपेठ प्रसिद्ध असून येथे डोंबिवली, ठाणे, मोहपाडा, रसायनी आदी शहरांतून खरेदीसाठी मोठ्या संख्येने ग्राहक येतात. त्यामुळे कर्जतचा तिखट मिरचीचा बाजार गरम असतो; मात्र लॉकडाऊनमुळे कर्जतच्या मिरचीला कोरोनाचा ठसका लागल्याचे दिसून येत आहे.
पुणे, ठाणे, पालघर, रायगड आणि मुंबई या जिल्ह्यातील चवदार आणि चविष्ट खाणारे खवय्ये यांच्यासाठी कर्जतच्या बाजारातील मिरचीला महत्त्व आहे. त्यात हैद्राबाद गंटूरवरून येणारी मिरची यावर्षी जास्त भाव खात आहे. त्यामुळे मिरचीची घाऊक व्यवसाय करणारे संकटात सापडले आहेत. कर्जत मिरची बाजारात लवंगी, संकेश्वरी, बेडगी, काश्‍मिरी, टोमॅटो, तेलपट्टी, अंकुर, बोर, गंटूर आदी जातींच्या मिरच्या विक्रीस असतात. जर लॉकडाऊन उठले नाही, तर मिरची पडून राहील आणि लाखोंचे नुकसान होईल, अशी भीती व्यापारी व्यक्त करत आहेत.
कर्जत तालुक्‍यात सुमारे 170 पेक्षा अधिक गावे आहेत. पावसाळा सुरू होण्यापूर्वी खारोड्या, पापड्या, पापड आदी खाद्यपदार्थ तयार करून त्याचा साठा केला जातो. त्याचप्रमाणे वर्षभर पुरेल इतका लाल मिरच्यांपासून गरम मसाला तयार करण्यात येतो; मात्र यावर्षी कोरोनामुळे बाजारपेठ मंदावली असून, सरकारने देशभरात लॉकडाऊन, तसेच संचारबंदी लागू केली आहे. त्यामुळे मिरची खरेदी करण्यासाठी फारसे ग्राहक येत नसल्याचे मिरची व्यापाऱ्यांनी सांगितले.
दरवर्षीच्या तुलनेत यंदा मिरचीच्या विक्रीत पन्नास टक्क्यांपेक्षा अधिकने घट झाली आहे. त्यातच लॉकडाऊन वाढल्याने यापुढे मिरची खरेदीसाठी कितपत ग्राहक येतील याबाबत साशंकता आहे .
- पंकज परमार, मिरची व्यापारी, कर्जत बाजारपेठ
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.