आश्चर्यच..! कलिंगड, सिमला मिरची अगदी कलरफुल!

वाडा : वाडा तालुक्‍यातील शेतकऱ्यांनी पारंपरिक शेतीला छेद देत अत्याधुनिक शेती सुरू केली आहे. फळे, फुले, भाजीपाला अशी अनेक उत्पादने घेऊन शेतीत नवनवीन प्रयोग आता शेतकरी करू लागले आहेत. असाच एक प्रयोग देवघर येथील युवा शेतकरी प्रफुल्ल पाटील यांनी केला आहे. त्यांनी आपल्या पाच एकर जागेत सिमला मिरची व रंगीबेरंगी कलिंगडाचे उत्पादन घेतले आहे. 

रंगीबेरंगी कलिंगडासाठी नोव्हा या कंपनीच्या अनमोल आणि विशाखा या वाणाच्या कलिंगडाची लागवड पाटील यांनी केली. बियाणे लागवडीपासून ९० दिवसांत हे पीक तयार झाले आहे. मल्चिंग आणि ठिंबक पद्धतीने ही शेती केल्याने मनुष्यबळ अगदी कमी झाले. अवघ्या एक-दोन माणसांमध्ये शेतीचे नियोजन करत असल्याचे पाटील यांनी सांगितले. 

हेही वाचा ः आता जेवढा कराल 'कचरा' तेवढा भरावा लागेल 'टॅक्स'

पाटील यांनी पिवळ्या व हिरव्या अशा दोन रंगात कलिंगडाचे उत्पादन घेतले आहे. पिवळ्या कलिंगडातील आतील गर हा लाल आहे; तर हिरव्या कलिंगडातील आतील गर हा पिवळा आहे. तसेच काही कलिंगडे चौकोनी, बदामी अशा या आकारामध्येदेखील तयार केली आहेत. एक कलिंगड तीन ते चार किलोपर्यंत झाल्याचे प्रफुल्ल पाटील यांनी सांगितले. एका किलोला १८ ते २० रुपये दर असल्याने एकरी ४ लाखांचे उत्पन्न मिळेल, असा अंदाज त्यांनी व्यक्त केला. 

हेही वाचा ः 'हे' खा आणि आयुष्यभर फिट राहा 

तसेच लाल, पिवळ्या व हिरव्या अशा तीन रंगात सिमला मिरचीचे पीक घेतले आहे. त्यासाठी रिझवान या वाणाचे बियाणे वापरले आहे. १० गुंठे जागेत ४ हजार झाडे लावली आहेत. इनसेट नेटमध्ये सिमला मिरचीची लागवड केली असल्याचे 
पाटील यांनी सांगितले.