मासळी आली, पण... ; वसई-पाचूबंदर येथील मत्स्यविक्रेते हवालदिल

विरार : मागील दीड वर्षांतील कोरोनास्थिती (corona), डिझेलसह मासेमारी साहित्याचे वाढलेले भाव आणि पडलेले मासळीचे दर (fish rate collapse) अशा नाना समस्यांचा सामना करत वसईतील मच्छीमार (vasai fish traders) मासेमारीकरता समुद्रात उतरला खरा; पण श्रावण महिन्यातील उपवासांमुळे पुन्हा एकदा ग्राहक नसल्याने (no custmors) या मच्छीमारांसमोर संकट उभे राहिले आहे.गेल्या तीन वर्षा पासून मच्छीमाराना कधी वादळ, कधी अतिवृष्टी (heavy rainfall) तर कधी कोरोना यामुळे त्याच्यावर उपासमारीची (finance problem) पाळी आली आहे

जवळपास दोन महिन्याच्या मासेमारी बंदी कालावधीनंतर 1 ऑगस्टपासून मासेमारी हंगाम सुरू झाला आहे. यंदा 3 ते 5 ऑगस्टदरम्यान समुद्रात वादळी वाऱ्याची शक्यता हवामान खात्याने वर्तवून मासेमारीकरता समुद्रात जाऊ नये, असा सतर्कतेचा इशारा दिला होता. त्यामुळे 6 ऑगस्टनंतरच मच्छीमारांना मासेमारीसाठी जाण्याचे मत्स्यव्यवसाय विभागाने सूचित केले होते.त्यानुसार पालघर जिल्ह्यातील 60 टक्के बोटी 6 ते 7 ऑगस्ट रोजी खोल समुद्रात गेल्या होत्या. यात वसईतील बोटी मोठ्या प्रमाणात होत्या.

पैकी काही बोटी लवकर किनारी परतल्या असल्या तरी मासेमारीच्या आरंभी कमी मासे मिळाल्याचे सांगितले जात आहे.वसईतील मच्छीमारांकडून आणल्या गेलेल्या मासळीचा लिलाव पाचूबंदर येथील मच्छीमार सोसायटीकडून दर मंगळवारी रात्री आयोजित करण्यात येतो; या लिलावात मुंबई, ठाणे, नाशिक आणि अन्य ठिकाणाहून व्यापारी बोलीकरता सहभागी होतात; मात्र सोमवारपासून श्रावण सुरु झाल्याने या बाज़ाराकडे व्यापाऱ्यांसह ग्राहकांनी पाठ फिरवल्याचे मच्छीविक्रेते ब्लेस माठक यांनी सकाळशी बोलताना सांगितले.

विशेष म्हणजे गेल्या वर्षीच्या तुलनेत यंदा 25 ते 30 रुपयांनी डिझेल दरवाढ झाली आहे. खलाशांचे पगार वाढल्याने 10-12 दिवसांच्या मासेमारी फेरीसाठी 35 ते 40 हजार रुपयांचा खर्च वाढला आहे. अशा परिस्थितीत 350 ते 500 ग्राम वजनाच्या पापलेट माशांची आवक अपेक्षित असताना परतलेल्या बोटीना 200 ते 300 ग्राम वजनाचे लहान आकाराचे पापलेट लागत आहेत त्यात एक्पोर्टर्सनी पापलेटचा भाव आधीच कमी करून ठेवला आहे. त्यामुळे किलोमागे 250 ते 300 रुपयांचा फ़टका मत्स्य विक्रेत्यांना सहन करावा लागत असल्याचे पाचूबंदर येथील सांतान सोदीया यांनी सांगितले,