August Kranti Maidan:'..तरी काहींच्या पोटात दुखतंय'; आझाद मैदानातून फडणवीसांची टीका

Mumbai News - मुंबईत सुशोभीकरणाचे कामे सुरु आहेत. चांगले काम केलं जात आहे. तरी काहींच्या पोटात दुखतंय. ते दररोज एक पत्र लिहितात. त्यांनी गेल्या २५ वर्षात ही पत्र लिहिली असती तर मुंबईची ही अवस्था झाली नसती, असं म्हणत उपमुख्यमंत्री देवेंद्र फडणवीस यांनी उद्धव ठाकरे यांच्यावर टीका केली. फडणवीस आझाद क्रांती मैदानातून बोलत होते. यावेळी मुख्यमंत्री एकनाथ शिंदे, उपमुख्यमंत्री अजित पवार उपस्थित होते.

ऐतिहासिक ऑगस्ट क्रांती मैदानातून फडणवीस म्हणाले की, 'महात्मा गांधी यांनी चले जावचा नारा देताना करो या मरो हा नारा देखील दिला होता. ते होते म्हणून आपण आहोत आणि त्यांच्यामुळे स्वातंत्र्य मिळाले. इंग्रजांची एकही खूण आपल्याला नको. सर्व स्वातंत्र्यसैनिकांना माझे नमन आहे. गुलामीच्या खुणा आपल्याला पुसून टाकायच्या आहेत. चले जाव चळवळीला आज 81 वर्ष पूर्ण झालीयेत.'

जाती, धर्म, पंथ, भाषा, लिंग, या आधारावर कोणताही भेद होणार नाही. याची काळजी आपल्याला घ्यायची आहे. ॲागस्ट क्रांती मैदानाचा चेहरामोहरा बदलला म्हणून पालिका आयुक्तांचे मी अभिनंदन करतो. मुख्यमंत्र्यांच्या काळात मुंबईत अनेक कामं होत आहेत. पण चांगली काम होत असताना काही लोक टीका करतात. टीका करण्याऐवजी तुम्ही मागच्या २५ वर्षात स्वतःला पत्र लिहायला हवं होत, असं म्हणत फडणवीसांनी उद्धव ठाकरे यांच्यावर टीका केली.(Latest Marathi News)

फडणवीस यांनी यावेळी पालिका आयुक्त चहल यांचे कौतुक केले. चहल चांगले काम करत आहेत. टीका होत राहतील, पण तुम्ही पारदर्शक काम करत रहा. निंदकाचे घर असावे शेजारी, असं म्हणतात ते खरंच आहे. तुम्ही आपलं काम करत रहा. मुख्यमंत्र्यांच्या नेतृत्त्वाखाली मुंबईतील रस्ते खड्डे मुक्त होतील, असा विश्वास फडणवीसांनी यावेळी व्यक्त केला.