Palghar Crime news: म्हैस चरण्यावरुन झाला वाद अन् डोक्यात घातला दगड.. शेतकऱ्यांच्या भांडणात एकाचा मृत्यू

पालघर, ता.२३ (बातमीदार) : सफाळे येथील खार्डी दोन शेतकऱ्यांमध्ये म्हैस चरण्याच्या वादातुन एकाच्या हत्येचा प्रकार उघडकीस आला आहे. आरोपी वसंत सखाराम भोईर याने प्रकाश यशवंत घरत याच्या डोक्यात दगड घालून त्याची हत्या केली. केळवे सागरी पोलिस ठाणे अंतर्गत असलेल्या खार्डी गावातील दूध व्यवसाय करणाऱ्या वरील दोन शेतकऱ्यांमध्ये म्हैस चारण्यावरून वाद होता.

रविवारी (ता.२३) संध्याकाळी या दोघांमधील वादाचे रुपातंर मोठ्या भांडणात झाले. सोमवारी हे दोघे आपल्या म्हशी चरायला गावाच्या बाहेर लांबवर घेऊन गेले असताना दोघांमध्ये बाचाबाची झाली. यानंतर दोघांमध्ये हाणामारीत होत आरोपी वसंत भोईर याने खाडी किनाऱ्यावर असलेला दगड उचलून जमिनीवर पडलेल्या प्रकाश घरत याच्या डोक्यात घातला. यामध्ये प्रकाश घरत यांचा मृत्यू झाला. याप्रकरणी पोलिसांनी गुन्हा दाखल केला आहे.