Building Collapse : डोंबिवलीमध्ये धोकादायक इमारत कोसळली, दोन जण ढिगाऱ्याखाली अडकले

डोंबिवलीः डोंबिवली पूर्व येथील जुना आयरे रोड परिसरातील एक धोकादायक इमारत कोसळल्याची घटना घडली आहे. ही इमारत धोकादायक झाल्याने शुक्रवारी सकाळपासून इमारत खाली करण्यात येत होती.

इमारतीमधील रहिवासी बाहेर पडत असतानाच सायंकाळी 5 च्या आसपास इमारत पत्त्याप्रमाणे कोसळली. या इमारतीमध्ये सध्या 2 जण अडकले असून त्यांना बाहेर काढण्यासाठी अग्निशमन दल व पालिका प्रशासनाचे शर्थीचे प्रयत्न सुरू आहेत. अरविंद भाटकर (वय 70) व गीता लोढा (वय 54) अशी आत अडकलेल्या नागरीकांची नावे आहेत.

डोंबिवली पूर्वेतील आदिनारायण ही तळमजली अधिक 3 मजली इमारत शुक्रवारी सायंकाळी कोसळली. यामध्ये 37 खोल्या व 7 दुकाने होती. 10 कुटुंब येथे वास्तव्यास होती अशी माहिती पालिका प्रशासनाने दिली आहे.

ही इमारत धोकादायक झाली होती, त्यातच काल इमारतीला क्रॅक गेल्याने केडीएमसी प्रशासनाने ही इमारत खाली करण्याच्या सूचना नागरिकांना दिल्या होत्या. सकाळी पालिका अधिकारी, कर्मचारी या ठिकाणी येऊन नागरिकांना बाहेर काढत होते. सायंकाळी नागरिक आपले सामान घरातून बाहेर काढत असतानाच अचानक इमारतीचा वरील भाग कोसळू लागल्याने सर्वजण बाहेर पळाले.

यात अरविंद हे मात्र इमारतीत अडकले आहेत. ते आजारी असल्याने बेडवर होते. त्यांचा मुलगा सिद्धेश व आई हे बाहेर पडले पण अरविंद आतच अडकले. तर गीता यांना आधीपासून पालिका कर्मचारी बाहेर या असे सांगत होते मात्र त्यांनी दरवाजा बंद करून घेत घरात स्वतःला कोंडल्याने त्या आत अडकल्याची माहिती प्रभाग अधिकाऱ्यांनी दिली. घटनास्थळी डोंबिवली अग्निशमन दलाच्या 2 गाड्या, रुग्णवाहिका दाखल झाल्या आहेत. अग्निशमन दलाच्या वतीने अडकलेल्या व्यक्तींचा शोध सुरू आहे.

''या ठिकाणी धोकादायक इमारत खचल्याची दुर्घटना घडली आहे. इमारत धोकादायक झाल्याने पालिका प्रशासनाच्या वतीने त्यांना नोटीस देण्यात आली होती. तसेच शुक्रवारी सकाळपासून पालिका अधिकारी व कर्मचारी या इमारतीमध्ये लोकांना बाहेर काढण्याचे काम करत होते. परंतु सायंकाळी अचानक इमारत कोसळली, यामध्ये दोन जण अडकल्याची माहिती मिळत आहे. त्यांचे बचाव कार्य सुरू आहे. तसेच आसपासच्या धोकादायक इमारती देखील खाली करण्यात आल्या आहेत.''

- डॉ. भाऊसाहेब दांगडे, आयुक्त, केडीएमसी