Eknath Shinde : २७ पर्यंत मंत्रिमंडळाचा विस्तार अशक्य?

मुंबई - मुख्यमंत्री एकनाथ शिंदे आणि उपमुख्यमंत्री देवेंद्र फडणवीस दिल्लीत गेल्याने शुक्रवारी पुन्हा एकदा मंत्रिमंडळ विस्ताराची चर्चा रंगली; प्रत्यक्षात या दौऱ्यानंतरही म्हणजे, येत्या २७ पर्यंत मंत्रिमंडळाचा विस्तार होण्याची शक्यता नसल्याचे सांगण्यात आले.

शिवसेना आणि बंडखोर गटाच्या याचिकांवरील न्यायालयाच्या सुनावणीनंतरच नव्या मंत्र्यांच्या शपथविधीचा मुहूर्त असू शकतो. नव्या मंत्र्यांचा शपथविधी लवकरच होईल यापेक्षा वेगळे उत्तर सरकारकडून दिले जात नाही. मुख्यमंत्री आणि उपमुख्यमंत्र्यांचा शपथविधी होऊन आता २० दिवस होत आले तरी, मंत्रिमंडळाच्या विस्ताराला मुहूर्त सापडलेला नाही. त्यामुळे शिंदे गट आणि भाजप यांच्या गोटात अस्वस्थता असल्याची चर्चा होती. त्यावरून शिवसेना, राष्ट्रवादी काँग्रेस आणि काँग्रेसनेही सत्ताधाऱ्यांना डिवचले. तरीही, मंत्रिमंडळाच्या हालचालींना वेग आला नाही.

शिवसेना आणि बंडखोर गटांत न्यायालयात लढा सुरू असून, त्यावर आता एक ऑगस्टला सुनावणी होणार आहे. त्यामुळे लांबणीवर पडलेला मंत्रिमंडळ विस्तार पुढच्या दोन-चार दिवसांत होण्याचा अंदाज होता. त्यातच मुख्यमंत्री शिंदे आणि फडणवीस हे दिल्लीला गेले आहेत. माजी राष्ट्रपती रामनाथ कोविंद यांच्या निरोप समारंभासाठी हे दोघे दिल्लीत गेले असून, या दौऱ्यात सत्तावाटपावरून अंतिम चर्चा होण्याची शक्यता होती. मात्र, त्याला दुजोरा मिळाला नाही. त्यामुळे किमान आठवडाभर तरी मंत्रिमंडळ विस्ताराविनाच हे सरकार काम करणार असल्याचे स्पष्ट आहे.