शिंदेंचं 'कल्याण', आमदार विश्वनाथ भोईर शिंदेगटात, सचिन बासरेंकडे शिवसेनेची जबाबदारी

कल्याण पश्चिम विधानसभा मतदार संघाचे शिवसेना आमदार विश्वनाथ भोईर हे शिंदे गटात सामील झाल्याने आता शिवसेना माजी नगरसेवक सचिन बासरे यांची नियुक्ती जाहीर झाल्याने पुन्हा कल्याण मध्ये राजकीय वातावरण तापले आहे .

राज्यात सत्ता परिवर्तन होऊन ही शिवसेना आणि शिंदे गट मधील वाद काही मिटत नसल्याचे समोर आले आहे. शिंदे गटाला पाठींबा देणाऱ्या कल्याण पश्चिम विधानसभा मतदार संघाचे शिवसेना आमदार विश्वनाथ भोईर यांना चांगले महागात पडले आहे. शुक्रवारी पत्रकार परिषद घेत विश्वनाथ भोईर यांनी मी शिवसेनेत असून, मी राजीनामा देणे प्रश्न नसून, पक्ष प्रमुख उद्धव ठाकरे हेच असून नेते एकनाथ शिंदे असल्याचे स्पष्ट केले होते. त्याला काही तास होत नाही तोच शिवसेना माजी नगरसेवक सचिन बासरे यांची कल्याण पश्चिम शिवसेना प्रमुखपदी नियुक्ती जाहीर केल्याने राजकीय वर्तुळात एकच चर्चा होती.

सचिन बासरे यांनी रवि कपोते, शरद पाटील, वंडार कारभारी, दिनेश शेटे आदीच्या उपस्थित शहर शाखेत पदभार स्वीकारला. यावेळी शिवसैनिकाला शहरप्रमुख पद दिल्याचा आनंद व्यक्त करत पक्ष सोडून जाण्याचे प्रकार अनेक वेळा झाले असून, कल्याण सहित राज्यातील शिवसैनिक आहे तेथेच असून जेव्हा जेव्हा पक्षावर संकट आले तेव्हा शिवसैनिक काल आज आणि उद्या ही उभा राहणार असून, आम्ही उद्धव जिच्या पाठीशी कायम असून पालिकेवर शिवसेनेचा भगवा फडकवू. असा दावा यावेळी सचिन बासरे यांनी केला. यामुळे भविष्यात कल्याण मध्ये ही शिवसेनेतील शिंदे गट आणि ठाकरे गट मध्ये संघर्ष पेटण्याची शक्यता नाकारता येत नाही.