शिवसेना नेते ईडीच्या रडावर; आनंदराव अडसूळ यांना ईडीचा समन्स

मुंबई : ईडीच्या (Enforcement Directorate) रडावर अजून एक शिवसेना नेते आले आहे. मनी लॉडरींग प्रकरणी शिवसेना नेते आणि माजी केंद्रीय मंत्री आनंदराव अडसूळ (Anandrao Adsul) आणि त्यांचा मुलगा अभिजीत अडसूळ (Abhijit Adsul) यांना ईडीने चौकशीसाठी (investigation) हजर राहण्यासाठी समन्स बजावला. ईडीचे एक पथक आज (ता. 27 सप्टेंबर) अडसूळ यांच्या मुंबईतील कांदिवली इथल्या घरी जाऊन आले. मात्र चौकशीदरम्यान आनंदराव अडसूळ यांची प्रकृती खालावल्यामुळे त्यांना रुग्णालयात दाखल करण्यात आले.

बडनेरा मतदासंघाचे आमदार रवी राणा यांनी सिटी कोऑपरेटीव्ह बँकेतील घोटाळ्यासंदर्भात ईडीकडे तक्रार दाखल केली होती. त्यांच्या तक्रारीवरुन कारवाई झाल्याचे सांगीतले जाते. आनंदराव अडसूळ हे या बँकेचे संचालक असतांना झालेल्या 980 कोटी रुपयाच्या कथित गैरव्यवहाराबद्दल ईडीची चौकशी सुरु आहे. मुंबई पोलिसाच्या आर्थिक गुन्हे शाखेने यापुर्वी बँकेच्या कर्ज वाटप आणि इतर व्यवहारात झालेल्या अनियमतेबाबत गुन्हा दाखल करुन, चौकशी केली होती. याच आधारावर ईडीने अडसूळ यांच्यावर मनी लाँडरीगचा गुन्हा दाखल करुन आनंदराव अडसूळ यांची चौकशी केली होती.

त्यांचा जबाबही नोंदवला होता. 2019 च्या लोकसभा निवडणूकीत अमरावती मतदारसंघातून नवनित राणा यांनी आनंदराव अडसूळ यांना पराभूत केले. खासदार नवनित राणा यांचे जातीचे प्रमाणपत्र बोगस असल्याचे सांगत अडसूळ यांनी त्याला मुंबई हायकोर्टात आव्हान दिलं होत.बॉम्बे हायकोर्टाने हे प्रमाणपत्र रद्द करण्याचा निर्णय दिला. त्यानंतर हे प्रकरण पुढे सर्वोच्च न्यायालयात गेलं, हायकोर्टाच्या निर्णयाला स्थगिती देण्यात आली.